സർക്കാർ മേഖലയിൽ അത്യാധുനിക ക്യാൻസർ ചികിത്സ സംവിധാനവുമായി തിരുവനന്തപുരം റീജിയണൽ ക്യാൻസർ സെന്ററും (RCC), തലശേരി മലബാർ ക്യാൻസർ സെന്ററും(MCC). 5 വയസിൽ താഴെയുള്ള കുട്ടികളുടെ കണ്ണില് ഏറ്റവും കൂടുതല് കാണപ്പെടുന്ന റെറ്റിനോ ബ്ലാസ്റ്റോമയ്ക്കുള്ള ചികിത്സയും ന്യൂറോ സര്ജിക്കല് ഓങ്കോളജി സംവിധാനവും സംസ്ഥാനത്ത് ആദ്യമായി MCC-യില് ആരംഭിച്ചു. കണ്ണിന്റെ കാഴ്ച പൂര്ണമായും നഷ്ടപ്പെടാനിടയുള്ള ഈ ക്യാൻസർ നേരത്തെ കണ്ടെത്തി ചികിത്സിച്ചാല് പൂര്ണമായും കാഴ്ച്ചയും ജീവനും നിലനിര്ത്താന് കഴിയും. വിവിധ സര്ക്കാര് പദ്ധതികളിലൂടെ സൗജന്യമായി സമഗ്ര ചികിത്സ നല്കുന്നതിനുള്ള സൗകര്യങ്ങള് MCC-യില് ഒരുക്കിയിട്ടുണ്ട്.
ലേസര് ചികിത്സ, ക്രയോതെറാപ്പി തുടങ്ങിയ കണ്ണിലേക്ക് നേരിട്ട് നല്കുന്ന ചികിത്സയും കൂടാതെ ആവശ്യമായ സാഹചര്യങ്ങളില് കീമോതെറാപ്പി, റേഡിയേഷന് എന്നിവയുമാണ് ചികിത്സ രീതി. സിസ്റ്റമിക് കീമോതെറാപ്പി, ഇന്ട്രാ ആര്ട്ടീരിയല് കീമോതെറാപ്പി, ഇന്ട്രാവിട്രിയല് കീമോതറാപ്പി, സബ്ടീനോണ് കീമോതറാപ്പി എന്നിവയാണ് റെറ്റീനോ ബ്ലാസ്റ്റോമ ഭേദമാക്കാനുള്ള കീമോതെറാപ്പികള്.തലച്ചോറിലെയും സുഷുമ്ന നാഡിയിലെയും ക്യാന്സറിന്റെയും മറ്റു മുഴകളെയും നീക്കം ചെയ്യുന്ന ശസ്ത്രക്രിയ സംവിധാനമായ ന്യൂറോ സര്ജിക്കല് ഓങ്കോളജിയുമായി ബന്ധപ്പെട്ട നൂതന സൗകര്യങ്ങള് MCC-യില് ഒരുക്കിയിട്ടുണ്ട്. കുട്ടികള്ക്കുള്ള മജ്ജ മാറ്റിവക്കല് ചികിത്സ, ലിംബ് സാല്വേജ് ശസ്ത്രക്രിയ, ബ്രെയിന് ട്യൂമര് സര്ജറി, ചികിത്സാനുബന്ധ പുനരധിവാസം (റീഹാബിലിറ്റേഷന്) എന്നീ സൗകര്യങ്ങളും MCC-യില് ലഭ്യമാണ്.
ന്യൂറോ എന്ഡോക്രൈന് ട്യൂമറുകളുടെ ചികിത്സയായ ലുട്ടീഷ്യം സര്ക്കാര് മേഖലയില് ആദ്യമായി RCC-യിലെ ന്യൂക്ലിയര് മെഡിസിന് ഡിപ്പാര്ട്ട്മെന്റിൽ സജ്ജമാക്കി. ഇതിനോടനുബന്ധിച്ചുള്ള ഗാലിയം ജനറേറ്റര് RCC-യില് ഉടൻ കമ്മീഷന് ചെയ്യും .
