ട്രെയിനില്‍ ദീര്‍ഘദൂര യാത്രകള്‍ക്ക് സ്ലീപ്പര്‍ കോച്ചുകളാണ് പൊതുവേ ആളുകള്‍ പരിഗണിക്കുന്നത്. എന്നാല്‍ ചെറിയ യാത്രകള്‍ക്കായി ജനറല്‍ ടിക്കറ്റ് എടുക്കാറുമുണ്ട്. ജനറല്‍ ടിക്കറ്റ് എടുത്ത് തിക്കിലും തിരക്കിലും നില്‍ക്കുമ്പോള്‍ സ്ലീപ്പര്‍ കോച്ച് ലഭിച്ചിരുന്നെങ്കിലെന്ന് യാത്രക്കാര്‍ ചിന്തിക്കാറുണ്ട്. അതിന് അവസരമൊരുക്കിയിരിക്കുകയാണ് റെയില്‍വേ. ഇതനുസരിച്ച് ജനറല്‍ ടിക്കറ്റെടുത്തവർക്ക് ഒഴിവുള്ള സ്ലീപ്പര്‍ കോച്ചുകള്‍ ഉപയോഗിക്കാമെന്ന് റെയില്‍വേ ബോര്‍ഡ് അറിയിച്ചു.
കൊടും ശൈത്യം ആണ് ഇത്തരമൊരു തീരുമാനത്തിലേക്ക് റെയില്‍വേ എത്താന്‍ കാരണം. അതിശൈത്യം മൂലം ആളുകള്‍ ട്രെയിനില്‍ സ്ലീപ്പര്‍ കോച്ചുകള്‍ തിരഞ്ഞെടുക്കാതെ പകരം എസി കോച്ചുകളില്‍ യാത്ര ചെയ്യാനാണ് താല്‍പര്യപ്പെടുന്നത്. അതോടെ എസി കോച്ചുകളുടെ ആവശ്യകത ഉയരുകയും സ്ലീപ്പറില്‍ ആളില്ലാതാവുകയും ചെയ്തു. മൊത്തം ബര്‍ത്തുകളുടെ 80 ശതമാനത്തില്‍ താഴെ സ്ലീപ്പര്‍ ക്ലാസ് കോച്ചുകള്‍ ഉള്ള ട്രെയിനുകളുടെ വിവരങ്ങള്‍ ശേഖരിക്കുവാനും റെയില്‍വേ ബോര്‍ഡ് റെയില്‍വേയുടെ എല്ലാ ഡിവിഷനുകള്‍ക്കും നിര്‍ദേശം നല്‍കി.
യാത്രക്കാര്‍ക്ക് യാത്ര സുഗമമാക്കാന്‍ സ്ലീപ്പര്‍ കോച്ചുകളെല്ലാം ജനറൽ കോച്ചുകളാക്കി മാറ്റാനാണ് റെയില്‍വേ അധികൃതര്‍ ആലോചിക്കുന്നത്. ഈ കോച്ചുകള്‍ക്ക് പുറത്ത് റിസര്‍വ് ചെയ്യാത്ത സീറ്റുകള്‍ അടയാളപ്പെടുത്തും, ജനറല്‍ കോച്ചുകളാക്കി മാറ്റിയതിന് ശേഷം ഈ കോച്ചുകളില്‍ മിഡില്‍ ബര്‍ത്തുകള്‍ അനുവദിക്കില്ലെന്നും റെയില്‍വെ അറിയിച്ചു. പുതിയ തീരുമാനമനുസരിച്ച് ജനറല്‍ ടിക്കറ്റ് എടുത്തവര്‍ക്ക് , സ്ലീപ്പര്‍ കോച്ചുകളില്‍ റിസര്‍വേഷന്‍ ഇല്ലാതെയും യാത്ര ചെയ്യാന്‍ സാധിക്കും.
