വേനൽക്കാലമായാൽ നാട്ടിൻപുറമാകെ ചക്കപ്പഴത്തിൻ്റെയും മാമ്പഴത്തിൻ്റെയും മണമായിരിക്കും. അടുക്കളയാകട്ടെ ഇവ കൊണ്ടുള്ള വിഭവങ്ങളാൽ നിറയും.
ചക്ക വറുത്തെടുത്ത് സൂക്ഷിക്കുന്ന പതിവ് ഈ സമയത്തുണ്ട്. പച്ച ചക്ക രണ്ടായി മുറിച്ച് ചുളകൾ വൃത്തിയാക്കിയെടുക്കാം. അവ ഒരേ വീതിയിലും നീളത്തിലും അരിഞ്ഞ് മഞ്ഞൾപ്പൊടിയും ഉപ്പും ചേർത്തിളക്കി യോജിപ്പിച്ച് തിളച്ച എണ്ണയിൽ വറുത്തെടുക്കാം. ചക്കയുടെ ചുള മാത്രമല്ല അതിൻ്റെ കുരുവും ഇങ്ങനെ വറുത്തെടുക്കാം.കുരുവിൻ്റെ തൊലി കളഞ്ഞ് വൃത്തിയാക്കി അരിഞ്ഞെടുത്താൽ മതി.
ചേരുവകൾ
ചക്കക്കുരു
മുളകുപൊടി
ഉപ്പ്
മഞ്ഞൾപ്പൊടി
കറിവേപ്പില
വെളിച്ചെണ്ണ.
തയ്യാറാക്കുന്ന വിധം
ചക്കക്കുരു നന്നായി കഴുകി തൊലി കളഞ്ഞെടുക്കാം.
ഇത് കട്ടി കുറച്ച് നീളത്തിൽ അരിഞ്ഞു ഒരു ബൗളിലെടുക്കാം.
ഇതിലേയ്ക്ക് ആവശ്യത്തിന് ഉപ്പ്, മുളകുപൊടി, ഒരു നുള്ള് മഞ്ഞൾപ്പൊടി, അൽപം വെളിച്ചെണ്ണ കുറച്ച് കറിവേപ്പില എന്നിവ ചേർത്തിളക്കി യോജിപ്പിച്ച് മാറ്റി വയ്ക്കാം.
അടി കട്ടിയുള്ള ഒരു പാത്രം അടുപ്പിൽ വച്ചു ചൂടാക്കാം.
ഇതിലേയ്ക്ക് വെളിച്ചെണ്ണ ഒഴിച്ചു ചൂടാക്കാം.
മസാല പുരട്ടി മാറ്റി വച്ചിരിക്കുന്ന ചക്കക്കുരു ചൂടായ എണ്ണയിൽ വറുത്തെടുക്കാം. ഇത് ചൂടോടെ തന്നെ കഴിച്ചു നോക്കൂ.
