വെള്ളത്തിന്റെ ശുദ്ധി പരിശോധിക്കാൻ ഇനി ജല അതോറിറ്റിയുടെ 82 ജലപരിശോധനാ ലാബുകൾ

ഈ സർക്കാർ അധികാരമേൽക്കുമ്പോൾ 17 ലക്ഷം ഗ്രാമീണ കുടുംബങ്ങളിലായിരുന്നു ജല അതോറിറ്റി കണക്ഷനുകൾ ഉണ്ടായിരുന്നത്. കഴിഞ്ഞ ഒന്നര വർഷം കൊണ്ട് 13 ലക്ഷം പുതിയ കണക്ഷൻ നൽകിയതായി മന്ത്രി പറഞ്ഞു.  കേരളത്തിൽ 70,80,000 മുകളിൽ ഗ്രാമീണ കുടുംബങ്ങൾ ആണുള്ളത്.  2024-25 വർഷത്തിന്റെ ആരംഭത്തോടെ സംസ്ഥാനത്തെ എല്ലാ ഗ്രാമീണ കുടുംബങ്ങൾക്കും സമ്പൂർണമായും ഗുണനിലവാരമുള്ള ശുദ്ധജലം ലഭ്യമാക്കുക എന്ന ലക്ഷ്യം മുൻനിർത്തിയാണ് ജലജീവൻ മിഷൻ പദ്ധതി ആവിഷ്‌കരിച്ചിട്ടുള്ളതെന്ന് മന്ത്രി റോഷി അഗസ്റ്റിൻ പറഞ്ഞു.

പദ്ധതി നല്ല രീതിയിൽ മുന്നോട്ടു നയിക്കുന്ന വകുപ്പിലെ ഉദ്യോഗസ്ഥരെ മന്ത്രി അഭിനന്ദിച്ചു. കേരള ജല അതോറിറ്റിക്ക് കുടിശ്ശിക ഇനത്തിൽ കിട്ടാനുള്ള തുക പിരിച്ചുകിട്ടാൻ അദാലത്തുകൾ നടത്തുന്നുണ്ടെങ്കിലും ഇനിയും തുക പിരിഞ്ഞു കിട്ടാനുണ്ടെന്ന് മന്ത്രി ചൂണ്ടിക്കാട്ടി. ഇക്കാര്യത്തിൽ ജനം പൂർണമായി സഹകരിക്കേണ്ടതുണ്ടെന്ന് അദ്ദേഹം ഓർമ്മിപ്പിച്ചു. ഉപഭോക്താക്കൾക്ക് സ്വയം വാട്ടർ മീറ്റർ റീഡിംഗ് നടത്താനായി ആവിഷ്‌ക്കരിച്ച സെൽഫ് മീറ്റർ റീഡിംഗ് ആപ്പ്, മീറ്റർ റീഡർമാർക്ക് റീഡിംഗ് രേഖപ്പെടുത്തൽ അനായാസമാക്കാൻ ഏർപ്പെടുത്തിയ മീറ്റർ റീഡർ ആപ്പ് എന്നിവ ജലവിഭവ മന്ത്രി ഉദ്ഘാടനം ചെയ്തു. ചടങ്ങിൽ ഗതാഗത വകുപ്പ് മന്ത്രി ആൻറണി രാജു, പ്രമോദ് നാരായണൻ എം.എൽ.എ, അഡീഷനൽ ചീഫ് സെക്രട്ടറി വി വേണു, കേരള ജല അതോറിറ്റി എം.ഡിയും ജലജീവൻ മിഷൻ ഡയറക്ടറുമായ വെങ്കടേശപതി എസ്, കോർപ്പറേഷൻ കൗൺസിലർ പാളയം രാജൻ തുടങ്ങിയവർ സംസാരിച്ചു.