ടെലികോം റെഗുലേറ്ററി അതോറിറ്റി (ട്രായ്) വാളോങ്ങും മുൻപേ 3 ടെലികോം കമ്പനികളും പുതിയ ‘കോൾ ആൻഡ് എസ്എംഎസ് ഒൺലി’ റീചാർജ് പ്ലാനുകളുടെ നിരക്ക് കുറച്ചു. പുതിയ പ്ലാനുകൾ അവതരിപ്പിച്ചെങ്കിലും നിരക്കിൽ കാര്യമായ കുറവുണ്ടായില്ലെന്ന ആക്ഷേപങ്ങളെത്തുടർന്ന് പ്ലാനുകൾ പരിശോധിക്കുമെന്ന് ട്രായ് അറിയിച്ചിരുന്നു. എയർടെൽ ആണ് ആദ്യം കുറച്ചത്. 84 ദിവസം വലിഡിറ്റിയുള്ള കോൾ, എസ്എംഎസ് മാത്രമുള്ള പ്ലാനിൽ 30 രൂപയും ഒരു വർഷം വലിഡിറ്റിയുള്ള പ്ലാനിൽ 110 രൂപയും കുറച്ചു. ഏകദേശം 6 ശതമാനത്തോളം കുറവാണ് വരുത്തിയത്.
ഇന്റർനെറ്റ് കൂടി ഉൾപ്പെട്ട പ്ലാനിനെക്കാൾ 8% നിരക്കു കുറഞ്ഞു. ആദ്യഘട്ടത്തിൽ 2% കുറവ് മാത്രം നൽകാൻ കമ്പനികൾ തയാറായതാണ് പ്രതിഷേധത്തിനു കാരണമായത്. റിലയൻസ് ജിയോ 84 ദിവസത്തെ പ്ലാനിൽ 30 രൂപയും വാർഷിക പ്ലാനിൽ 210 രൂപയും കുറച്ചു. ഒപ്പം വാലിഡിറ്റിയിൽ 29 ദിവസം കുറയ്ക്കുകയും ചെയ്തു. എയർടെലിനു സമാനമായ പുതിയ 2 പ്ലാനുകളാണ് വോഡഫോൺ–ഐഡിയ അവതരിപ്പിച്ചത്. കഴിഞ്ഞ ദിവസം കൊണ്ടുവന്ന 1,460 രൂപയുടെ പ്ലാൻ പിൻവലിക്കുകയും ചെയ്തു.
പുതിയ നിരക്കുകൾ ഇങ്ങനെ (ബ്രാക്കറ്റിൽ പഴയനിരക്ക്)
റിലയൻസ് ജിയോ
448 രൂപ (458 രൂപ): 84 ദിവസം വലിഡിറ്റി. അൺലിമിറ്റഡ് കോൾ, 1,000 എസ്എംഎസ്
∙ 1,748 രൂപ (1,958 രൂപ): 336 ദിവസം (മുൻപ് 365 ദിവസം) വലിഡിറ്റി. അൺലിമിറ്റഡ് കോൾ, 3,600 എസ്എംഎസ്
അധിക സേവനം: ജിയോ ടിവി, ജിയോ സിനിമ, ജിയോക്ലൗഡ്
എയർടെൽ
469 രൂപ (499 രൂപ): 84 ദിവസം വലിഡിറ്റി. അൺലിമിറ്റഡ് കോൾ, 900 എസ്എംഎസ്:
1,849 രൂപ (1,959 രൂപ): 365 ദിവസം വലിഡിറ്റി. അൺലിമിറ്റഡ് കോൾ, 3,600 എസ്എംഎസ്
വോഡഫോൺ–ഐഡിയ
470 രൂപ: 84 ദിവസം വലിഡിറ്റി, അൺലിമിറ്റഡ് കോൾ, 900 എസ്എംഎസ്
1,849 രൂപ: 365 ദിവസം വലിഡിറ്റി, അൺലിമിറ്റഡ് കോൾ, 3,600 എസ്എംഎസ്”
