സമോസ കച്ചവടം നടത്തി ദിവസവും ലക്ഷങ്ങൾ സമ്പാദിക്കാനാകുമോ? ബംഗളൂരുവിലെ ഒരു ദമ്പതികളോടാണ് ഈ ചോദ്യമെങ്കിൽ അതെ എന്ന ഉത്തരമാകും ലഭിക്കുക. ത്രികോണാകൃതിയിലുള്ളതും രുചികരവുമായ ജനപ്രിയ ഇന്ത്യൻ ലഘുഭക്ഷണമായ സമൂസ ശിഖർ വീർ സിങ്-നിധി സിങ് ദമ്പതികളുടെ ജീവിതം മാറ്റിമറിച്ച കഥയാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്.
നിധി സിങ്ങും ഭർത്താവ് ശിഖർ വീർ സിംഗും 2016-ലാണ് ബെംഗളൂരുവിൽ തങ്ങളുടെ ആദ്യ സമോസ കട തുടങ്ങിയത്. ഉയർന്ന ശമ്പളമുള്ള കോർപ്പറേറ്റ് ജോലി ഉപേക്ഷിച്ചാണ് ഇരുവരും സമോസ കച്ചവടത്തിലേക്ക് ഇറങ്ങിയത്. എന്നാൽ കോർപറേറ്റ് ജോലി ചെയ്തപ്പോൾ ലഭിച്ചതിനേക്കാൾ എത്രയോ ഉയർന്ന നിലയിലുള്ള സമ്പാദ്യമാണ് അവർക്ക് കച്ചവടത്തിലൂടെ ലഭിക്കുന്നത്. മാധ്യമ റിപ്പോർട്ടുകൾ പ്രകാരം, ‘സമോസ’ വിറ്റ് ദമ്പതികൾ പ്രതിദിനം 12 ലക്ഷം രൂപ സമ്പാദിക്കുന്നുവത്രെ.
സമോസ ഉണ്ടാക്കാനായി ഒരു വലിയ അടുക്കള സ്ഥലം ആവശ്യമാണെന്ന് തോന്നിയപ്പോൾ, അവരുടെ അപ്പാർട്ട്മെന്റ് വിറ്റ് ആ പണം കൊണ്ട് ബെംഗളൂരുവിൽ ഒരു ഫാക്ടറി വാടകയ്ക്കെടുക്കുകയായിരുന്നു ശിഖർ വീറും നിധിയും.
ഹരിയാനക്കാരായ ഈ ദമ്പതികൾ തങ്ങളുടെ വീട് വിറ്റ പണവും മറ്റ് സാമ്പാദ്യവും ഉപയോഗിച്ച് ഫാക്ടറിക്കൊപ്പം ആദ്യ ഔട്ട്ലെറ്റും ആരംഭിച്ചു, താമസിയാതെ ഒരു വലിയ അടുക്കള സ്ഥാപിക്കാൻ മാത്രമായി 80 ലക്ഷം രൂപയാണ് ഇരുവരും നിക്ഷേപിച്ചതെന്ന് വീക്കെൻഡർ റിപ്പോർട്ട് ചെയ്തു.
2015ൽ ജോലി ഉപേക്ഷിച്ച ദമ്പതികൾ തൊട്ടടുത്ത വർഷമാണ് ബെംഗളൂരുവിൽ ‘സമോസ സിംഗ്’ എന്ന ബ്രാൻഡിൽ ഔട്ട്ലെറ്റ് തുറന്നത്. അവിടെ നിന്ന് തുടങ്ങിയ ആ യാത്ര ഇരുവരുടെയും ജീവിതം മാറ്റിമറിക്കുന്നതാണ് പിന്നീട് കാണാനായത്. ഒരു ദിവസം എല്ലാം ചെലവും കഴിഞ്ഞ് ഏകദേശം 12 ലക്ഷത്തോളം രൂപ ലാഭം ലഭിക്കുന്നതായാണ് റിപ്പോർട്ട്.