നിലമ്പൂരിൽ നിന്നും ഇനി മുതൽ രാവിലെ 5.30 ന് ഷൊർണൂരിലേക്ക് പുതിയ ട്രെയിൻ. നിലമ്പൂർ റെയിൽവേയെ ആശ്രയിക്കുന്ന യാത്രക്കാരുടെ ദീർഘകാല ആവശ്യത്തിനാണ് റെയിൽവേ മന്ത്രാലയം പച്ചക്കൊടി കാണിച്ചിരിക്കുന്നത്.നിലമ്പൂരില്‍ നിന്ന് കോയമ്പത്തൂര്‍, തൃശൂര്‍,എറണാകുളം,കോഴിക്കോട് എന്നിവിടങ്ങളിലേക്ക് ഓഫീസ് സമയത്തിന് എത്തുവാനും, തിരുവനന്തപുരത്ത് ഉച്ചയോടെ എത്തുന്ന ജനശതാബ്ദി എക്സ്പ്രസ്സ് കണക്ഷന്‍ ലഭിക്കുവാനും പുതിയ സമയത്തെ സർവീസ് സഹായകരം ആണ്. പുതിയ സമയ ക്രമം ഒക്ടോബർ 1 മുതൽ നടപ്പാക്കും.
7.10 ന് ഷൊർണൂരിൽ എത്തിച്ചേരുന്ന ഈ ട്രെയിൻ തിരുവനന്തപുരം, മംഗലാപുരം , കോയമ്പത്തൂർ മേഖലകളിലേക്ക് ഉള്ള യാത്രക്കാർക്ക് ഏറെ ഉപകാരപ്പെടും .7.35 ന് തിരുവനന്തപുരത്തേക്ക് പോകുന്ന 12081 കണ്ണൂര്‍-തിരുവനന്തപുരം ജനശതാബ്ദി എക്സ്പ്രസ്, 7.50 ന് മംഗലാപുരത്തേക്ക് പോകുന്ന 22610 കോയമ്പത്തൂര്‍ -മംഗലാപുരം ഇന്‍റര്‍സിറ്റി എക്സ്പ്രസ്, 7.30 ന് പുറപ്പെടുന്ന തൃശൂര്‍ -കണ്ണൂര്‍ അണ്‍റിസര്‍വ്ഡ് എക്സ്പ്രസ് , 8.20 ന് പുറപ്പെടുന്ന06458 ഷൊറണൂര്‍-കോയമ്പത്തൂര്‍ അണ്‍റിസര്‍വ്ഡ് എക്സ്പ്രസ് എന്നീ ട്രെയിനുകളിൽ പോകാൻ യാത്രക്കാർക്ക് 5.30 ൻ്റെ നിലമ്പൂർ റോഡ് – ഷൊറണൂർ 06470 നമ്പര്‍ അണ്‍റിസര്‍വ്ഡ് എക്സ്പ്രസ് ഉപകാരപ്പെടും.
ഇതോടൊപ്പം മറ്റ് ചില മാറ്റങ്ങൾ കൂടി ഉണ്ട്. മുൻപ് രാവിലെ 7.05 ന് പോയിരുന്ന പാസഞ്ചർ ആണ് ഇപ്പൊൾ 5.30 ന് പുറപ്പെടുന്നത്. അപ്പോൾ 7.05 ൻ്റേ സമയത്ത് പാസഞ്ചർ ആയി ഓടിക്കുക പുലർച്ചെ കൊച്ചുവേളിയിൽ നിന്ന് വന്ന രാജ്യറാണി എക്സ്പ്രസ് ആയിരിക്കും. ഇതിൻ്റെ എസി കമ്പാർട്ട്മെൻ്റ് പൂട്ടി ആയിരിക്കും പാസഞ്ചർ ആയി ഓടുക. ഈ ട്രെയിൻ തിരികെ നിലമ്പൂരിലേക്ക് 10.40 ന് തിരികെ എത്തും. 5.30 ന് പുതിയ സർവീസ് വരുന്ന സാഹചര്യത്തിൽ മുൻപ് 11.10 ന് പുറപ്പെട്ടിരുന്ന പാസഞ്ചർ റദ്ദാക്കിയിട്ടുണ്ട്.
നിലമ്പൂര്‍-മൈസൂര്‍ റെയില്‍വേ ആക്ഷന്‍ കൗണ്‍സില്‍ ആണ് ഈ ഒരു ട്രെയിൻ സർവീസിന് വേണ്ടി ഏറെ പോരാട്ടം നടത്തിയത്.അബ്ദുള്‍ വഹാബ് എം.പി, അബ്ദുസമദ് സമദാനി എം.പി, കത്തുകളയച്ച റെയില്‍വേ പാസഞ്ചേഴ്സ് അമനിറ്റി കമ്മിറ്റി ചെയര്‍മാന്‍ പി.കെ കൃഷ്ണദാസ്, രാഹുല്‍ ഗാന്ധി എം.പി, മുന്‍ എം.പി സുരേഷ് ഗോപി, ഇ.ടി. മുഹമ്മദ് ബഷീര്‍ എം.പി തുടങ്ങിയ എല്ലാവരും ഇതിന് സഹായിച്ചു എന്ന് ആക്ഷൻ കൗൺസിൽ നന്ദി പ്രകടിപ്പിച്ചു കൊണ്ട് ഫേസ്ബുക്കിൽ കുറിച്ചു.പുതിയ ട്രെയിൻ എന്ന അവശ്യം നേടിയെടുക്കാൻ കഴിഞ്ഞതിൻ്റെ സന്തോഷം പി വി അബ്ദുല് വഹാബ് എം പി യും പങ്ക് വെച്ചു.
‘അതിരാവിലെ ഷൊർണൂരിലെത്താൻ ഒരു ട്രെയിൻ വേണമെന്നത് നിലമ്പൂരിന്റെ കാലങ്ങളായുള്ള ആവശ്യമാണ്. പല ഘട്ടങ്ങളിലായി ഇക്കാര്യം ഉന്നയിച്ച് റെയിൽവേ അധികൃതരുമായി ബന്ധപ്പെട്ടിരുന്നു. ഡൽഹിയിലെ റെയിൽവേ ബോർഡ് ചെയർമാനും ചെന്നൈയിലെ സതേൺ റെയിൽവേ ജനറൽ മാനേജർക്കുമെല്ലാം കത്തയക്കുകയും അവരെ ഫോണിൽ ബന്ധപ്പെട്ട് നിരന്തരം ഓർമ്മിപ്പിക്കുകയും ചെയ്തിരുന്നു. ഒടുവിൽ ആവശ്യം അംഗീകരിക്കപ്പെട്ടിരിക്കുകയാണ്. ഇനി രാവിലെ 5:30ന് നിലമ്പൂരിൽനിന്ന് ഷൊർണൂരിലേക്ക് ട്രെയിൻ കയറാം. രാവിലെ 7:10ന് ഈ ട്രെയിൻ ഷൊർണൂരിലെത്തും.
നിലമ്പൂർ ഷൊർണൂർ ട്രെയിൻ സമയക്രമം ഇങ്ങനെ നിലമ്പൂർ ഷൊറണൂർ പാസഞ്ചർ 5.30 – 7.10 7.00 – 8.40 10.10 – 11.50 15.10 – 16.40 ( കോട്ടയം പാസഞ്ചർ ) 16.10 – 17.47 ( പാലക്കാട് പാസഞ്ചർ ) 20.00 – 21.40 21.30 – 22.50 ( കൊച്ചുവേളി രാജ്യ റാണി)
ഷൊര്‍ണൂര്‍- നിലമ്പൂർ സമയ ക്രമം 3.50 – 6.00 7.05 – 8.50 09.00 – 10.40 10.20 – 11.45 14.05 – 15.45 17.55 – 19.35 20.10 – 22.00
