പ്രതിദിന ഹൈവേ നിർമ്മാണവേഗത 30.11 കിമി മാത്രം; പാഴ്‌വാക്കായി 60 കിമി വേഗവാഗ്ദാനം; വാർഷിക റിപ്പോർട്ട് വൈകുന്നു; ലോക്സഭാ തിരഞ്ഞെടുപ്പിനു മുമ്പ് വേഗം കൂട്ടാനാകുമോ?

അതിവേഗപാതകളിൽ ഡിജിറ്റൽ ഇൻഫ്രാ; 2 വർഷത്തിനുള്ളിൽ 10,000 കിലോമീറ്റർ ഒപ്റ്റിക്കല്‍ ഫൈബര്‍ ശൃംഖല; ഇന്ത്യയെ ഡിജിറ്റലാക്കും ‘ഡിജിറ്റല്‍ ഹൈവേ’ പദ്ധതി

cഇന്ത്യയുടെ ഡിജിറ്റല്‍ ഇന്‍ഫ്രാസ്ട്രക്ചറിന്റെ അവസ്ഥ എന്താണ്? 2016ല്‍ വേള്‍ഡ് ഇക്കണോമിക് ഫോറം (WEF) സമാഹരിച്ച നെറ്റ്‌വർക്ക്ഡ് റെഡിനസ് ഇന്‍ഡക്‌സ് പ്രകാരം 139 രാജ്യങ്ങളില്‍ 91-ാം സ്ഥാനമാണ് ഇന്ത്യക്കുള്ളത്. അതായത് ഇന്ത്യയില്‍ 100ല്‍ 15 കുടുംബങ്ങള്‍ക്ക് മാത്രമേ ഇന്റര്‍നെറ്റ് ആക്‌സസ് ലഭിക്കുന്നുള്ളൂ. കഴിഞ്ഞ രണ്ട് ദശാബ്ദത്തിനിടയില്‍ കുറെയേറെ മാറ്റങ്ങള്‍ സംഭവിച്ചിട്ടുണ്ടെങ്കിലും ഇന്റര്‍നെറ്റ് കണക്റ്റിവിറ്റിയില്ലാത്ത 350 ദശലക്ഷം മൊബൈല്‍ ഉപയോക്താക്കള്‍ ഇന്ത്യയിലുണ്ടെന്നാണ് കണക്കുകള്‍ പറയുന്നത്. ഈ അവസ്ഥ തുടരുമ്പോഴാണ് ഡിജിറ്റിലൈസേഷന്റെ ജനാധിപത്യവല്‍ക്കരണം സാധ്യമാക്കാന്‍ രാജ്യം ശ്രമിക്കുന്നത്. ഡിജിറ്റല്‍ ഇന്‍ഫ്രാസ്ട്രക്ചറിന്റെ വളര്‍ച്ച സാധ്യമാകുന്നതോടെ വലിയ മാറ്റം സാധ്യമാകുമെന്നാണ് കരുതുന്നത്.

ചെറിയ പട്ടണങ്ങളിലും ഗ്രാമങ്ങളിലും ഡിജിറ്റല്‍ സാക്ഷരത ഉറപ്പുവരുത്തുന്നതോടെ റീട്ടെയില്‍, ഐടി, ടെലികോം, സാമ്പത്തിക സേവനങ്ങള്‍ തുടങ്ങിയ മേഖലകളില്‍ തൊഴില്‍ സൃഷ്ടിക്കാന്‍ സാധിക്കും. ഗവണ്‍മെന്റിന്റെ പ്രധാന പദ്ധതിയായ നാഷണല്‍ ഒപ്റ്റിക്കല്‍ ഫൈബര്‍ നെറ്റ്‌വർക്ക് (NOFN) ഇനിയും ഗ്രാമീണ ഇന്ത്യയില്‍ ഒരു വാഗ്ദാനം മാത്രമായി നില്‍ക്കുകയാണ്. ഡിജിറ്റല്‍ ഇന്‍ഫ്രാസ്ട്രക്ചറിന്റെ വളര്‍ച്ച സാധ്യമാകണമെങ്കില്‍ നാഷണല്‍ ഒപ്റ്റിക്കല്‍ ഫൈബര്‍ നെറ്റ്‌വർക്ക് സാധ്യമാകേണ്ടതുണ്ട്.

എന്താണ് ഡിജിറ്റല്‍ ഹൈവേ?

നടപ്പുസാമ്പത്തിക വര്‍ഷം ഹൈവേ വികസത്തിന്റെ വേഗത വര്‍ദ്ധിപ്പിക്കാനും 10,000 കിലോമീറ്റര്‍ ഡിജിറ്റല്‍ ഹൈവേകള്‍ നിര്‍മ്മിക്കാനുമാണ് റോഡ് ഗതാഗത, ഹൈവേ മന്ത്രാലയം (MoRTH) ലക്ഷ്യമിടുന്നത്. ഇതിനായി ഇന്‍ഫ്രാസ്ട്രക്ചര്‍ ഇന്‍വെസ്റ്റുമെന്റ് ട്രേസ്റ്റ് മോഡിലൂടെ 10,000 കോടി രൂപ സമാഹരിക്കാനാണ് പദ്ധതിയിടുന്നതെന്ന് MoRTH സെക്രട്ടറി അല്‍ക്ക ഉപാധ്യായ വ്യക്തമാക്കി. ദേശീയപാതകളില്‍ ഒപ്ടിക് ഫൈബര്‍ കേബിളുകള്‍ (ഒഎഫ്‌സി) ഉള്‍പ്പെടുത്തിയാണ് ഡിജിറ്റല്‍ ഹൈവേ യാഥാര്‍ത്ഥ്യമാക്കുന്നത്. ഡിജിറ്റല്‍ ഹൈവേ പദ്ധതി സാധ്യമാക്കാന്‍ നാഷണല്‍ ഹൈവേ അതോറിറ്റി ഓഫ് ഇന്ത്യ(എന്‍എച്ച്എഐ)യുടെ കീഴിലുള്ള നാഷണല്‍ ഹൈവേയ്‌സ് ലോജിസ്റ്റിക്‌സ് മാനേജ്‌മെന്റ് ലിമിറ്റഡ് (എന്‍എച്ച്എല്‍എംഎല്‍) ദേശീയപാതയിലുടനീളം യൂട്ടിലിറ്റി കോറിഡോറുകള്‍ സ്ഥാപിക്കും. ഇത്തരത്തില്‍ 2025ഓടെ രാജ്യത്ത് പതിനായിരം കിലോമീറ്ററില്‍ ഒപ്റ്റിക്കല്‍ ഫൈബര്‍ ശൃംഖല സ്ഥാപിക്കുകയും രാജ്യത്തെ ഉള്‍പ്രദേശങ്ങളിലടക്കം ഇന്റര്‍നെറ്റ് കണക്ടിവിറ്റി എത്തിക്കുകയും ചെയ്യുക എന്ന ലക്ഷ്യത്തിലേക്കാണ് കേന്ദ്രം സഞ്ചരിക്കുന്നത്. ആദ്യഘട്ടത്തില്‍ ഡല്‍ഹി-മുബൈ അതിവേഗപാത, ഹൈദരാബാദ്-ബാംഗ്ലൂര്‍ ഇടനാഴി എന്നിവിടങ്ങളിലായിരിക്കും പദ്ധതി നടപ്പിലാക്കുക. ഡല്‍ഹി-മുംബൈ അതിവേഗപാതയില്‍ 1,367 കിലോമീറ്ററും ഹൈദരാബാദ്-ബാംഗ്ലൂര്‍ ഇടനാഴിയില്‍ 512 കിലോമീറ്ററുമാണ് പദ്ധതി നടപ്പില്‍ വരുത്തുക.

5ജി, 6ജി സേവനങ്ങള്‍ വ്യാപിക്കും

നോട്ടു നിരോധനവും കോവിഡും തീര്‍ത്ത സാമൂഹികാവസ്ഥയാണ് ഇന്ത്യയെ വളരെ വേഗത്തില്‍ ഡിജിറ്റലകാന്‍ പ്രേരിപ്പിച്ച ഘടകം എന്ന് ഏവര്‍ക്കും അറിയുന്ന കാര്യമാണ്. എന്നാല്‍ ഡിജിറ്റല്‍ സാക്ഷരതയില്ലാത്ത ഒരു തലമുറ ഇന്ത്യയിലുണ്ട് എന്ന കാര്യം രാജ്യം വിസ്മരിച്ച് പോകുന്നുമുണ്ട്. ഇന്ത്യ സമ്പൂര്‍ണ ഡിജിറ്റിലൈസേഷനിലേക്ക് സഞ്ചരിക്കുമ്പോള്‍ അവരുടെ ജീവിതത്തെയാകും അത് പ്രതികൂലമായി ബാധിക്കുക എന്നതില്‍ സംശയമില്ല. അതേസമയം ഇന്ത്യ ഡിജിറ്റലാകാന്‍ ആഗ്രഹിക്കുമ്പോഴും വലിയ പ്രതിസന്ധി ഇനിയും ഇന്റര്‍നെറ്റ് കണക്ടിവിറ്റിയില്ലാത്ത ഇന്ത്യന്‍ ഗ്രാമങ്ങളെ പരിഗണിക്കുക എന്നതാണ്. ഡിജിറ്റല്‍ ഹൈവേ അതിനായുള്ള മാര്‍ഗ്ഗമാണെന്ന് അധികൃതര്‍ വ്യക്തമാക്കുകയും ചെയ്തിരിക്കുന്നു. അതേസമയം 5ജി, 6ജി സേവനങ്ങള്‍ കൂടി ഡിജിറ്റല്‍ ഹൈവേ സാധ്യമാകുന്നതോടെ ലഭ്യമാകും.

 

ഡിജിറ്റല്‍ ഹൈവേ ശൃംഖല സ്ഥാപിക്കുന്നതിന്റെ ഭാഗമായി എന്‍എച്ച്എഐയുടെ പൂര്‍ണ്ണ ഉടമസ്ഥതയുലുള്ള സ്‌പെഷ്യല്‍ പര്‍പ്പസ് വെഹിക്കിളായ നാഷണല്‍ ഹൈവേസ് ലോജിസ്റ്റിക് മാനേജ്‌മെന്റ് ലിമിറ്റഡ് ദേശീയപാതകളില്‍ സംയോജിത യൂട്ടിലിറ്റി കോറിഡോറുകള്‍ വികസിപ്പിക്കും. 2025ഓടെ 10000 കിലോമീറ്ററില്‍ ഒപ്റ്റിക്കല്‍ ഫൈബര്‍ ശൃംഖല സ്ഥാപിക്കുകയും ചെയ്യും. ഗ്ലാസ് ഉപയോഗിച്ചോ പ്ലാസ്റ്റിക് ഉപയോഗിച്ചോ നിര്‍മ്മിക്കുന്നതായിരിക്കും ഫൈബര്‍ ഒപ്റ്റിക് കേബിള്‍. വിവരങ്ങള്‍ കൈമാറുന്നതിന് ഇതിലൂടെ വെളിച്ചമായിരിക്കും ഉപയോഗിക്കുക.

ടെലികോം അല്ലെങ്കില്‍ ഇന്റര്‍നെറ്റ് സേവനങ്ങള്‍ക്കായി പ്ലഗ് ആന്‍ഡ് പ്ലേയോ ഫൈബര്‍ ഓണ്‍ ഡിമാന്‍ഡ് മോഡല്‍ ഒഎഫ്‌സി നെറ്റ്‌വർക്ക് അനുവദിക്കും. ഉപഭോക്താക്കള്‍ക്ക് ഒരു വെബ് പോര്‍ട്ടലിലൂടെ നിശ്ചിത വിലയില്‍ ഇന്റര്‍നെറ്റ് ലഭ്യമാകും. ടെലികോം വകുപ്പുമായും ട്രായിയുമായും ഇതു സംബന്ധിച്ചുള്ള ആശയവിനിമയം നടന്നതായാണ് വിവരം. 2025ഓടെ ഡിജിറ്റല്‍ മേഖലയില്‍ വലിയ വിപ്ലവകരമായ മാറ്റങ്ങള്‍ സാധ്യമാക്കാന്‍ ഡിജിറ്റല്‍ ഹൈവേയ്ക്ക് കഴിയുമെന്ന് പ്രതീക്ഷിക്കാം