ഏറ്റവുമധികം ആളുകൾ ഉപയോഗിക്കുന്ന മെസേജിംഗ് ആപ്പാണ് വാട്സാപ്പ്. കുട്ടികൾ മുതൽ വൃദ്ധർ വരെ ഇത് ഉപയോഗിക്കാറുണ്ട്. സന്ദേശം അയക്കുന്നതിന് പുറമെ വീഡിയോ കോൾ ഓഡിയോ കോൾ എന്നിങ്ങനെ ഒട്ടനവധി സേവനങ്ങൾ വാട്സാപ്പ് നമുക്ക് നൽകുന്നു. ഉപഭോക്താക്കളുടെ സ്വകാര്യത സംരക്ഷിക്കുന്നതിനും നിരവധി സേവനങ്ങൾ വാട്സാപ്പിൽ ഉണ്ട്.
എന്നാൽ അതിൽ പലതും ചെയ്യേണ്ടത് എങ്ങനെയെന്ന് അധികമാർക്കും അറിയില്ല. അതിൽ ഒന്നാണ് പ്രൊഫൈൽ ഫോട്ടോ (ഡിപി) പലരിൽ നിന്നും മറയ്ക്കുന്നതിനുള്ള സേവനം. സ്വന്തം ചിത്രങ്ങളാകും പലരും ഡിപിയിൽ ഇടുന്നത്. ഇത് സാധാരണ ഗതിയിൽ നമ്മുടെ നമ്പറുള്ള എല്ലാവർക്കും കാണാൻ കഴിയും. അത് ചിലപ്പോൾ ചിത്രം ദുരുപയോഗം ചെയ്യുന്നതിന് കാരണമാകാം. എന്നാൽ വാട്സാപ്പിലെ ചില ഓപ്ഷനുകൾ മാറ്റിയാൽ ഡിപി നിങ്ങൾ ആഗ്രഹിക്കുന്നവർക്ക് മാത്രമേ കാണാൻ കഴിയു. അത് എങ്ങനെയാണെന്ന് നോക്കിയാലോ?
ഇതിനായി ആദ്യം നിങ്ങൾ വാട്സാപ്പ് തുറക്കണം. ശേഷംഅതിന് മുകളിലെ വലത് ഭാഗത്ത് കാണുന്ന മൂന്ന് ഡോട്ടുകളിൽ ക്ലിക്ക് ചെയ്യണം. അപ്പോൾ നിരവധി ഓപ്ഷനുകൾ കാണാം. അതിൽ അവസാനത്തെ ഓപ്ഷനായ സെറ്റിംഗ്സ് ഓപ്ഷനിൽ ക്ലിക്ക് ചെയ്യുക. എന്നിട്ട് അതിനുള്ളിലെ പ്രെെവസിയെന്ന ഓപ്ഷൻ തുറക്കണം. അതിൽ പ്രൊഫൈൽ ഫോട്ടോ എന്ന ഓപ്ഷൻ കാണാം.
അതിലാണ് മാറ്റം വരുത്തേണ്ടത്. അതിൽ ക്ലിക്ക് ചെയ്ത് അകത്ത് കയറുമ്പോൾ നാല് ഓപ്ഷനുകൾ ലഭിക്കുന്നു. നിങ്ങളുടെ പ്രൊഫൈൽ ഫോട്ടോ എല്ലാവർക്കും കാണാം, നിങ്ങളുടെ കോൺടാക്റ്റുകളിൽ ഉള്ളവർക്ക് മാത്രം, കോൺടാക്റ്റിലെ കുറച്ച് പേർക്ക് മാത്രം കാണാം, ആർക്കും ദൃശ്യമാകരുത് എന്നിവയാണ് അതിൽ ഉള്ളത്. ഇതിൽ നിങ്ങൾക്ക് ഇഷ്ടമുള്ള ഓപ്ഷൻ തിരഞ്ഞെടുക്കാം. ഇതിലൂടെ നിങ്ങൾ ആഗ്രഹിക്കുന്നവർക്ക് മാത്രമെ നിങ്ങളുടെ ഡിപി കാണുകയുള്ളൂ.
