ഉപയോക്താക്കൾക്ക് അവരുടെ ഫീഡിൽ വരുന്ന റീലുകളും മറ്റും റീസെറ്റ് ചെയ്യാൻ സാധിക്കുന്ന പുതിയ ഫീച്ചറുമായി ഇൻസ്റ്റഗ്രാം. മുൻപ് നടത്തിയിട്ടുള്ള സെർച്ചുകൾക്കും നമ്മുടെ താത്പര്യങ്ങളും അനുസൃതമായിട്ടുള്ള കണ്ടന്റുകളാണ് നിലവിൽ ഓരോരുത്തരുടേയും ഫീഡിൽ നിറഞ്ഞിട്ടുണ്ടാവുക. പുതിയ ഫീച്ചറിലൂടെ മുൻകാല പ്രവർത്തനങ്ങൾ മറക്കാനും ആദ്യം മുതലുള്ള മുൻഗണനകൾ മാറ്റാനും ആപ്പിനെ പ്രാപ്തമാക്കും.
ഇത് ആദ്യം നിങ്ങളുടെ ഇൻസ്റ്റാഗ്രാമിനെ കൂടുതൽ രസകരമാക്കും, കാരണം നിങ്ങളുടെ താത്പര്യങ്ങളെക്കുറിച്ച് ഞങ്ങൾക്ക് ഒന്നുമറിയാത്തതുപോലെ ഞങ്ങൾ നിങ്ങളോട് പെരുമാറും’ ഇൻസ്റ്റഗ്രാം ഹെഡ് ആദം മൊസ്സേരി പറഞ്ഞു.
ഉപയോക്താക്കൾ സമയം ചെലവഴിക്കുന്നതും സെർച്ച് ചെയ്യുന്നതുമായ കാര്യങ്ങളിലൂടെ അൽഗോരിതം വെച്ചാണ് ഓരോരുത്തരുടെയും ഫീഡുകൾ നിറയുന്നത്. അതിൽ മാത്രം ഒതുങ്ങിപ്പോകാതെ പുതിയ വിഷയങ്ങളും ആളുകളിലേക്ക് എത്തിക്കുന്നതിനുള്ള ഓപ്ഷനാണിത്. അൽഗോരിതം റീസെറ്റ് ചെയ്യുന്നതിലൂടെ പുതുതായി അക്കൗണ്ട് തുടങ്ങിയ പ്രതീതിയിൽ തന്നെ ഇൻസ്റ്റഗ്രാം പുതിയ ഫീഡുകൾ നൽകുമെന്നാണ് മെറ്റ അവകാശപ്പെടുന്നത്.
