മഴ തുടരുന്നത് തണുപ്പിന് തടസ്സമാകുന്നു’; ഡിസംബറിലും വിയർത്ത് കേരളം.

തണുത്തുവിറയ്ക്കേണ്ട വൃശ്ചികമാസം അവസാനിക്കാറായിട്ടും സംസ്ഥാനത്ത് തണുപ്പ് തുടങ്ങിയിട്ടില്ല. പകൽ താപനില ഉയർന്നുനിൽക്കുന്നത് കാരണം ചുട്ടുപൊള്ളുകയാണ് നാട്. കാലാവസ്ഥയിൽ വരുന്ന ഈ മാറ്റം ശൈത്യകാലവിളകളുടെ ഉത്പാദനത്തെ ബാധിക്കുമെന്ന് കർഷകർ ആശങ്കപ്പെടുന്നു. വടക്കൻ കേരളത്തിലാണ് തണുപ്പ് കാര്യമായി അനുഭവപ്പെടാത്തത്. മലയോരമേഖലയിൽ നേരിയ തണുപ്പ് ഉണ്ടെങ്കിലും മുൻ വർഷങ്ങളെക്കാൾ കുറവാണ്.

നവംബർ 28-നും ഡിസംബർ പത്തിനുമിടയിൽ രാജ്യത്തെ ഏറ്റവും ഉയർന്ന താപനില രേഖപ്പെടുത്തിയ നഗരങ്ങളുടെ പട്ടികയിൽ മൂന്നുതവണയാണ് കണ്ണൂർ വന്നത്. കണ്ണൂർ നഗരത്തിൽ ചൊവ്വാഴ്ച ഏറ്റവും കുറഞ്ഞ താപനില രേഖപ്പെടുത്തിയത് 25.6 ഡിഗ്രി സെൽഷ്യസാണ്. സാധാരണയിലും 3.3 ഡിഗ്രി സെൽഷ്യസ് കൂടുതൽ. തിങ്കളാഴ്ച ഉയർന്ന ചൂട് 34.7 ഡിഗ്രി സെൽഷ്യസായിരുന്നു. ഇത് രാജ്യത്തുതന്നെ ഏറ്റവും ഉയർന്നതായിരുന്നു. മഴ തുടരുന്നതാണ് തണുപ്പിന് തടസ്സമാകുന്നതെന്ന് കാലവസ്ഥാവിദഗ്ധൻ രാജീവൻ എരിക്കുളം അഭിപ്രായപ്പെട്ടു.