ചേർത്തല : ബസുകൾക്കായുള്ള കാത്തിരിപ്പുകൾക്കിടയിൽ യാത്രക്കാർക്കായി അക്ഷരവെളിച്ചമൊരുക്കി വിദ്യാർഥികൾ. ചേർത്തല തണ്ണീർമുക്കം റൂട്ടിൽ വെള്ളിയാകുളം ബസ് സ്റ്റോപ്പിലെ കാത്തിരിപ്പുകേന്ദ്രത്തിലാണ് വായനയുടെ വസന്തം തുറന്നത്. വെള്ളിയാകുളം ഗവ. യു.പി.സ്കൂളിലെ വിദ്യാർഥികളാണ് വായനശാലയൊരുക്കിയത്. 25 പുസ്തകങ്ങളാണുള്ളത്. ഒപ്പം ദിനപത്രങ്ങളുമുണ്ടാകും. ഓരോ ആഴ്ചയും പുസ്തകങ്ങൾ മാറ്റും. വായനവാരാഘോഷത്തിന്റെ ഭാഗമായി നടത്തിയ നാട്ടുവായനക്കൂട്ടം പരിപാടിയിലൂടെ ലഭിച്ച പുസ്തകങ്ങളാണ് ഇവിടെ നൽകുന്നത്. സമീപത്തെ ഓട്ടോറിക്ഷാത്തൊഴിലാളികളുടെ മേൽനോട്ടവുമുണ്ട്. തണ്ണീർമുക്കം പഞ്ചായത്ത് വൈസ് പ്രസിഡന്റ് പ്രവീൺ ജി. പണിക്കർ ഉദ്ഘാടനം ചെയ്തു.
