സർക്കാർജോലിയിൽ സ്ത്രീപങ്കാളിത്തം കൂട്ടാൻ ശുപാർശ. ഇതിനായി പി.എസ്.സി. നിയമനങ്ങൾക്ക് ഉയർന്ന പ്രായപരിധി 45 വയസ്സാക്കണമെന്ന് വനിതാകമ്മിഷൻ ആവശ്യപ്പെട്ടു. സർക്കാർ, സ്വകാര്യ മേഖലകളിലെ വനിതാ തൊഴിൽപങ്കാളിത്തം പഠിച്ച കമ്മിഷൻ, തുടർനടപടികൾക്കായി തൊഴിൽവകുപ്പിന് നിർദേശങ്ങളും സമർപ്പിച്ചു.
വിവാഹം, കുടുംബപരിരക്ഷ തുടങ്ങിയ കാരണങ്ങളാൽ സ്ത്രീകളുടെ തുടർപഠനവും തൊഴിൽസാധ്യതയും അനിശ്ചിതത്തിലാകുന്ന സാഹചര്യം വിലയിരുത്തിയാണ് സർക്കാർമേഖലയിൽ കൂടുതൽ അവസരം ഉറപ്പാക്കാൻ ഉദ്യോഗസ്ഥഭരണ പരിഷ്കാരവകുപ്പ് ഇടപെടണമെന്ന ആവശ്യം.
ഗർഭിണികൾക്കും പ്രസവാവധി കഴിഞ്ഞവർക്കും ഒരുവർഷമെങ്കിലും വർക്ക് ഫ്രം ഹോം അനുവദിക്കണമെന്ന് ശുപാർശ നൽകി. സ്വകാര്യമേഖലയിൽ തൊഴിൽസുരക്ഷിതത്വം ഉറപ്പാക്കാൻ നിയമം, പൊതുമേഖലയിലെ വേതനത്തിന്റെ 80 ശതമാനമെങ്കിലും സ്വകാര്യമേഖലയിലും ലഭിക്കുന്നുണ്ടെന്ന് ഉറപ്പാക്കൽ, തൊഴിലാളിക്ഷേമത്തിന് സ്വകാര്യ ചെറുകിടസ്ഥാപനങ്ങൾ ലാഭത്തിന്റെ 30 ശതമാനം വീതിക്കൽ എന്നിവയും ശുപാർശ ചെയ്തു.
പെൺകുട്ടികളുടെ പ്രവേശനത്തിന് തിരക്കുള്ള പി.ജി. കോഴ്സുകൾ തൊഴിലധിഷ്ഠിതമാക്കൽ, പാർടൈം ജോലികൾക്കും ഇന്റേൺഷിപ്പുകൾക്കും അധിക ക്രെഡിറ്റ് തുടങ്ങിയ നിർദേശങ്ങളും കമ്മിഷൻ നൽകിയിട്ടുണ്ട്.
മറ്റു പ്രധാന നിർദേശങ്ങൾ
സ്ത്രീകളെ തൊഴിൽശക്തിയുടെ ഭാഗമാക്കാൻ നികുതിയിളവ്. കുറഞ്ഞനിരക്കിൽ യാത്രാസൗകര്യം
* പത്ത്, പ്ലസ്ടു, യു.ജി., പി.ജി.ക്കാർക്ക് തൊഴിൽനൈപുണി, ഭാഷാപ്രാവീണ്യം, കംപ്യൂട്ടർ സാക്ഷരത എന്നിവയ്ക്ക് പാഠ്യപദ്ധതി പരിഷ്കാരം.
* ശമ്പളവർധനയ്ക്കും അവധിനിയമങ്ങൾക്കും ഏകീകൃത മാനദണ്ഡം.
