ഗൾഫിൽ കോവിഡ് വ്യാപനം കൂടുന്നു.യു.എ.ഇയിൽ തിങ്കളാഴ്ച 2515 പേരിലാണ് കോവിഡ് സ്ഥിരീകരിച്ചത്. ചികിത്സയിലായിരുന്ന 862 പേർ രോഗമുക്തി നേടുകയും ചെയ്തു. ഒരാൾകൂടി മരിച്ചു. ഒമാനിൽ 176 പേർക്ക് കൂടി കോവിഡ് സ്ഥിരീകരിച്ചു. പുതിയതായി മരണങ്ങളൊന്നും റിപ്പോർട്ട് ചെയ്തിട്ടില്ല. നിലവിൽ 98.2 ശതമാനമാണ് ഒമാനിലെ രോഗമുക്തി നിരക്ക്. 24 മണിക്കൂറിനിടെ സൗദി അറേബ്യയിൽ 1024 പേർക്കാണ് പുതുതായി കോവിഡ് സ്ഥിരീകരിച്ചത്. നിലവിലെ രോഗികളിൽ 298 പേർ സുഖം പ്രാപിച്ചു. ഒരു മരണം റിപ്പോർട്ട് ചെയ്തതായി സൗദി ആരോഗ്യ മന്ത്രാലയം അറിയിച്ചു. ഖത്തറിൽ 24 മണിക്കൂറിനിടെ 1177 പേരിൽകൂടി രോഗം റിപ്പോർട്ട് ചെയ്തു. 186 പേർ സുഖംപ്രാപിച്ചു.
കോവിഡ് വ്യാപനത്തിന്റെ പശ്ചാത്തലത്തിൽ പരിഷ്കരിച്ച ഐസലേഷൻ, ക്വാറന്റീൻ നിയമങ്ങൾ, കോവിഡ് രോഗികൾ സ്വീകരിക്കേണ്ട പുതിയ മാർഗരേഖ എന്നിവ അബുദാബി പബ്ലിക് ഹെൽത്ത് സെന്റർ പുറത്തിറക്കി. യു.എ.ഇ.യിലെ സർക്കാർ ജീവനക്കാർക്ക് ഗ്രീൻ പാസ് നിർബന്ധം എന്ന നിയമം പ്രാബല്യത്തിലായി. അൽ ഹൊസൻ ആപ്പിൽ ഗ്രീൻ പാസ് ഉണ്ടെങ്കിൽമാത്രമേ പൊതുജനങ്ങൾക്ക് സർക്കാർ ഓഫീസുകളിൽ പ്രവേശിക്കാനാവൂ. അബുദാബിയിൽ സർക്കാർ ജീവനക്കാർക്ക് നേരത്തേതന്നെ ഗ്രീൻ പാസ് നിർബന്ധമാണ്. പ്രതിദിന കോവിഡ് കേസുകൾ ഉയരാൻ തുടങ്ങിയതോടെയാണ് ഈ നിയമം യു.എ.ഇയിൽ മൊത്തം നടപ്പാക്കിയത്.
