ഹേമ കമ്മീഷൻ റിപ്പോർട്ട് ശനിയാഴ്ച; വ്യക്തികളുടെ സ്വകാര്യതയെ ഹനിക്കുന്ന ഭാഗങ്ങൾ ഒഴിവാക്കും

ഹേമ കമ്മീഷൻ റിപ്പോർട്ട് (Hema Commission Report) ഓഗസ്റ്റ് 17, ശനിയാഴ്ച പുറത്തുവിടും. വ്യക്തികളുടെ സ്വകാര്യതയെ ഹനിക്കുന്ന ഭാഗങ്ങൾ ഒഴിവാക്കിയാകും റിപ്പോർട്ട് പുറത്തുവിടുക. വിവരാവകാശ നിയമപ്രകാരമാണ് നടപടി.

സ്വകാര്യത ചൂണ്ടിക്കാട്ടി ജസ്റ്റിസ് ഹേമ കമ്മീഷൻ റിപ്പോർട്ട് പുറത്തുവിടുന്നത് തടയണമെന്ന് ആവശ്യപ്പെട്ട് സമർപ്പിച്ച ഹർജി കഴിഞ്ഞ ചൊവ്വാഴ്ച കേരള ഹൈക്കോടതി തള്ളിയിരുന്നു. റിലീസ് സ്റ്റേ ചെയ്യുന്നതിന് മുമ്പ് കോടതി സംസ്ഥാന സർക്കാരിനോടും വിവരാവകാശ കമ്മീഷനോടും പ്രതികരണം തേടിയിരുന്നു.

റിപ്പോർട്ട് പുറത്തുവിടുന്നതിനെതിരെ ചലച്ചിത്ര നിർമാതാവ് സജിമോൻ പാറയിൽ ഹൈക്കോടതിയെ സമീപിച്ചിരുന്നു. റിപ്പോർട്ട് പുറത്തുവരുന്നതോടെ സിനിമാ മേഖലയിലെ വ്യക്തികളുടെ സ്വകാര്യത ലംഘിക്കപ്പെടുമെന്ന് ഹർജിക്കാരൻ വാദിച്ചു. സിനിമാ വ്യവസായവുമായി ബന്ധപ്പെട്ട വിവരങ്ങൾ പങ്കുവെക്കുന്നവരെ അപകടത്തിലാക്കാൻ സാധ്യതയുണ്ടെന്ന് വാദിച്ചാണ് ഹർജിക്കാരൻ റിപ്പോർട്ട് പുറത്തുവിടുന്നത് തടയണമെന്ന് ആവശ്യപ്പെട്ടത്.