വിറ്റാമിന്‍ ഡി കുട്ടികളുടെ വളര്‍ച്ചയില്‍ വളരെ പ്രധാനപ്പെട്ട ഘടകമാണ്. അസ്ഥികളുടെ വളര്‍ച്ചയിലും രോഗപ്രതിരോശേഷി കൂട്ടുന്നതിലുമെല്ലാം ഇത് വലിയ പങ്ക് വഹിക്കുന്നുണ്ട്. കുട്ടികളില്‍ വിറ്റാമിന്‍ ഡി-യുടെ കുറവ് അകാല വാര്‍ധക്യത്തിന് കാരണമായിത്തീരും. കൂടാതെ പ്രതിരോധശേഷി ദുര്‍ബലമാക്കുകയും ചെയ്യും.
വിറ്റാമിന്‍ ഡി കുറയുന്നത് കുട്ടികളില്‍ വലിയ പ്രത്യാഘാതങ്ങള്‍ ഉണ്ടാക്കുമെന്ന് മക്ഗില്‍ യൂണിവേഴ്സിറ്റിയുടെ ഗവേഷണത്തില്‍ സൂചിപ്പിക്കുന്നു. 70-80 ശതമാനം
ഇന്ത്യക്കാര്‍ക്കും വിറ്റാമിന്‍ ഡി-യുടെ കുറവ് കാരണം പേശികളുടെ ശക്തി കുറയുന്നതായി മാക്‌സ് ഹെല്‍ത്ത്‌കെയര്‍ റിപ്പോര്‍ട്ടില്‍ വ്യക്തമാക്കുന്നുണ്ട്.
മുറിവ്, പേശികളുടെ ബലഹീനത, അസ്ഥി വേദന തുടങ്ങിയവ വിറ്റാമിന്‍ ഡി കുറയുന്നതിന്റെ ലക്ഷണങ്ങളാണ്. ക്ഷീണം, പേശി വേദന, മലബന്ധം, മാനസികാവസ്ഥയിലെ മാറ്റങ്ങള്‍ എന്നീ ലക്ഷണങ്ങളെയും ശ്രദ്ധിക്കണം. വിറ്റാമിന്‍ ഡി കുറവുള്ള കുട്ടികള്‍ക്ക് ബലക്കുറവും പേശികളില്‍ വേദനയോ ഉണ്ടാകും.
മറ്റൊന്ന്, വിറ്റാമിന്‍ ഡി-യുടെ കുറവ് കുട്ടികളില്‍ റിക്കറ്റിന് കാരണമാകും. ഇത് എല്ലുകള്‍ ദുര്‍ബലമാക്കും. കൂടാതെ കുട്ടികളില്‍ ഭാരക്കുറവ് ഉണ്ടാക്കും. കുട്ടിയുടെ ഭക്ഷണരീതികളില്‍ മാറ്റങ്ങള്‍ കണ്ടാല്‍ വൈദ്യസഹായം തേടണം. വിറ്റാമിന്‍ ഡി ലഭിക്കുന്നതിന് നേരിട്ട് സൂര്യപ്രകാശം കൊള്ളുന്നത് നല്ലതാണ്. സാല്‍മണ്‍ മത്സ്യം, പാല്‍, തൈര്, മത്തി, ചീസ്, ട്യൂണ, കൂണ്‍, മുട്ട, ധാന്യങ്ങള്‍ എന്നിവ കഴിക്കുന്നത് വിറ്റാമിന്‍ ഡി ലഭിക്കുന്നതിന് സഹായിക്കും.
