നാട്ടിലെങ്ങും മാങ്ങ നിറഞ്ഞു, കേടാകാതെ സൂക്ഷിക്കാൻ എന്തുചെയ്യും.

ഒരു നാട്ടുമാങ്ങ ചപ്പിവലിച്ചുകഴിക്കുന്ന സുഖം… ഉള്ളിൽ നിറയുന്ന മധുരം… തീർന്നു കഴിഞ്ഞാലും കൈയിൽനിന്നു വിട്ടുപോകാത്ത മണം. ജില്ലയുടെ മുക്കിലും മൂലയിലും ഇതനുഭവപ്പെടുകയാണിപ്പോൾ. മൂവാണ്ടൻ, നീലം, ചന്ദ്രക്കാരൻ, കർപ്പൂരം, പഞ്ചാരമാങ്ങയെന്നിങ്ങനെ വിവിധ പേരുകളിൽ നാട്ടിലെങ്ങും മാങ്ങ നിറഞ്ഞിരിക്കുന്നു. കണ്ണിമാങ്ങ മുതൽ മാമ്പഴംവരെ ആസ്വദിക്കാൻ ഇത്രയധികം കിട്ടിയ മറ്റൊരു വർഷമില്ലെന്നു പറയുന്നു.

“രോഗപ്രതിരോധശേഷി വർധിപ്പിക്കാനും ഉദരാരോഗ്യത്തിനും ഊർജംനിലനിർത്താനും സഹായിക്കുന്ന ധാരാളം പോഷകങ്ങൾ മാങ്ങയിലുണ്ട്. മാങ്ങാ അച്ചാർ, മാങ്ങാ ജ്യൂസ്, മാമ്പഴപ്പുളിശ്ശേരി എന്നിങ്ങനെ സർവത്ര മാങ്ങമയമാണ്. ചിലർക്ക് പഴുത്ത മാങ്ങയോടാണ് പ്രിയം. മറ്റു ചിലർച്ച് പച്ചമാങ്ങയോടും. ഇവയ്ക്കു രണ്ടും വ്യത്യസ്തമായ ആരോഗ്യഗുണങ്ങളാണുള്ളത്.

നിറയെ മാമ്പഴം, വിലയും കുറവ്

“മുൻവർഷത്തെക്കാൾ മാമ്പഴം വിപണിയിൽ ഒന്നിച്ചെത്തിയതോടെ മാമ്പഴവിപണിയിൽ വില കുറഞ്ഞു. നാട്ടുമാവിലെ മാമ്പഴമാണ് വിപണിയിൽ 95 ശതമാനവും വരുന്നത്. കഴിഞ്ഞ മാമ്പഴക്കാലത്ത് മൂവാണ്ടൻ മാമ്പഴത്തിന്റെ വില കിലോയ്ക്ക് 60 രൂപയായിരുന്നത് ഇത്തവണ 25 രൂപയിലേക്കെത്തി.

പ്രിയോറിന് കിലോയ്ക്ക് 80-90 രൂപയായിരുന്നുവെങ്കിൽ ഇത്തവണ 30-35 രൂപയായി മൊത്തവില. മാവ് പൂത്ത് കണ്ണിമാങ്ങയാകുമ്പോഴേ വില നൽകി കച്ചവടം ഉറപ്പിക്കുന്നതായിരുന്നു കഴിഞ്ഞവർഷംവരെ പതിവ്. എന്നാൽ, ഇത്തവണ കായ്ഫലം കൂടിയതോടെ കച്ചവടക്കാർക്കുപോലും വേണ്ടാതെ മാമ്പഴങ്ങൾ നിറഞ്ഞുകിടക്കുകയാണ്.