ഓണപ്പൂക്കളമൊരുക്കാൻ മറവൻതുരുത്തിലെ പൂക്കൾ.

ഓണത്തിനു പൂക്കളം ഒരുക്കാൻ മറവൻതുരുത്തിൽ പൂക്കൾ വിരിഞ്ഞു. ഓണവിപണി ലക്ഷ്യമാക്കി ‘നിറവ്’ പദ്ധതിയുടെ രണ്ടാം ഘട്ടമായി വൈക്കം ബ്ലോക്ക് പഞ്ചായത്ത് ആവിഷ്കരിച്ച ഓണത്തിന് ഒരു കുട്ട പൂ പദ്ധതിപ്രകാരം നടത്തിയ കൃഷിയിടങ്ങളിലാണ് പൂക്കൾ വിരിഞ്ഞത്. മറവൻതുരുത്ത് കൂടാതെ ചെമ്പ്, ടിവിപുരം, ഉദയനാപുരം, വെച്ചൂർ, തലയാഴം എന്നീ പഞ്ചായത്തുകളിലായി 15ഏക്കറോളം സ്ഥലത്താണ് പൂ കൃഷി ആരംഭിച്ചത്. ബ്ലോക്ക് പഞ്ചായത്ത്, കൃഷി വകുപ്പ്, മഹാത്മാഗാന്ധി തൊഴിലുറപ്പ് പദ്ധതി എന്നിവരുടെ നേതൃത്വത്തിലാണ് കൃഷി ആരംഭിച്ചത്. ഓരോ പഞ്ചായത്തിലും കുടുംബശ്രീ, പുരുഷ സ്വയംസഹായ സംഘങ്ങൾ തുടങ്ങി അൻപതോളം വർക്കിങ് ഗ്രൂപ്പാണ് കൃഷി നടത്തുന്നത്.