പണം ചെലവഴിക്കുന്ന കാര്യമായതിനാൽ തന്നെ വീട് വാങ്ങിക്കുന്നതിന് മുമ്പ് ചില കാര്യങ്ങൾ ശ്രദ്ധിക്കേണ്ടതുണ്ട്.

നിങ്ങളുടെ സാമ്പത്തികവും ലോൺ തിരിച്ചടവിനുമുള്ള സാഹചര്യം

ഇന്നത്തെ കാലത്ത് പലർക്കും വീട് വാങ്ങുകയെന്ന സ്വപ്നം യാഥാർഥ്യമാക്കാൻ സാധിക്കുന്നത് ഹോം ലോണുകൾ ഉള്ളത് കൊണ്ട് മാത്രമാണ്. ഒരു വീടിന് ഉദാഹരണത്തിന് 100 രൂപയാണ് ചെലവ് വരുന്നതെന്ന് പ്രതീക്ഷിക്കുന്നതെങ്കിലും അധികച്ചെലവുകൾ സ്വാഭാവികമായും ഉണ്ടാവും. അതായത് 100 പ്രതീക്ഷിച്ചിടത്ത് 120ഉും 130മൊക്കെ ആവാം. ഭവന വായ്പ വഴി 75-90% വരെ ധനസഹായമാണ് ലഭിക്കുക. ബാക്കി തുക നിങ്ങൾ തന്നെ കണ്ടെത്തേണ്ടതുണ്ട്. കൂടുതൽ ഡൗൺ പേയ്‌മെന്റ് നടത്തിയാൽ നിങ്ങളുടെ ലോൺ തിരിച്ചടവ് അത്രയും കുറയ്ക്കാൻ സാധിക്കും. ഇതോടെ ഇഎംഐ തുകയിലും കുറവുണ്ടാവും. ഇങ്ങനൊക്കെയാണെങ്കിലും ലോൺ അല്ലാതെ നിങ്ങൾ പണം കണ്ടെത്തേണ്ടി വരും. അതിനെക്കുറിച്ചും ആലോചിക്കേണ്ടതുണ്ട്. ഡൗൺ പേയ്‌മെന്റ് ലാഭിക്കാൻ നിരവധി മാർഗങ്ങളുണ്ട്. ഉദാഹരണത്തിന്, നിങ്ങൾക്ക് നിക്ഷേപം പരിഗണിക്കാവുന്നതാണ്. ഒരു എസ്‌ഐ‌പി വഴി ഇക്വിറ്റി മ്യൂച്വൽ ഫണ്ടിൽ പ്രതിമാസം 25,000 രൂപ അടച്ചാൽ മൂന്ന് വർഷം കഴിയുമ്പോൾ 12 ശതമാനം പലിശയോടെ 10.9 ലക്ഷം രൂപ നിങ്ങൾക്ക് തിരികെ ലഭിക്കും.

നിങ്ങളുടെ ലോൺ തിരിച്ചടക്കാനുള്ള കഴിവ് എത്രയെന്ന് നിങ്ങൾക്ക് ലോൺ അനുവദിക്കുന്ന സ്ഥാപനം പരിശോധിക്കും. എങ്കിലും നിങ്ങൾക്ക് തന്നെ അതേക്കുറിച്ച് വ്യക്തമായ കാഴ്ചപ്പാട് ഉണ്ടാവണം. ഇഎംഐക്ക് പുറമെ ജീവിതച്ചെലവ് എന്തെല്ലാമെന്ന് വിലയിരുത്തി വ്യക്തമായ പദ്ധതി തയ്യാറാക്കണം.