റോഡിൽ കുഴിയെ മാത്രമല്ല, അശ്രദ്ധയേയും സൂക്ഷിക്കണം

ബെറ്റർ ബി ലേറ്റ് ദാൻ നെവർ – റോഡിലൂടെ പോകുമ്പോൾ ട്രാഫിക് ഡിവൈഡറിന്റെ വശത്ത് ഇങ്ങനെ എഴുതിയിട്ടുള്ളത് കണ്ടിട്ടില്ലാത്തവർ കുറവായിരിക്കും. ലോക ട്രോമ ദിനത്തിൽ (World Trauma Day) അപകടം എന്നു കേൾക്കുമ്പോൾ വാഹന അപകടം എന്നു മാത്രം കരുതരുത്. ഉയരത്തിൽ നിന്നുള്ള വീഴ്ചകൾ, തീപിടുത്തം മൂലമുള്ള അപകടങ്ങൾ, പൊള്ളൽ, സ്ത്രീകൾക്കും കുട്ടികൾക്കും മുതിർന്നവർക്കും എതിരെയുള്ള ഗാർഹിക പീഡനം തുടങ്ങിയവയെല്ലാം ട്രോമയിൽ ഉൾപ്പെടുന്നു.

അപകടങ്ങളുടെ കണക്കെടുത്താൽ റോഡപകടങ്ങൾക്കാണ് ഒന്നാം സ്ഥാനം. ഭൂരിപക്ഷം അപകടങ്ങളും താൽക്കാലികമായോ സ്ഥിരമായോ ഗുരുതരമായ വൈകല്യങ്ങൾക്കോ മരണത്തിനോ കാരണമാകുന്നു. അപകടത്തിൽപെടുന്ന വ്യക്തിയുടെ ശരീരത്തിൽ ഏൽക്കുന്ന ഏതൊരു ക്ഷതവും ട്രോമ ആയിട്ടാണ് കണക്കാക്കുന്നത്. അപകടങ്ങൾ കൂടുതലും കണ്ടുവരുന്നത് ചെറുപ്പക്കാരിലാണ്. അശ്രദ്ധയോടൊപ്പം റോഡുകളുടെ അശാസ്ത്രീയമായ രൂപകൽപനയും മോശം പരിപാലനവും മുന്നറിയിപ്പ് ബോർഡുകളുടെ അഭാവവുമൊക്കെ റോഡ് അപകടങ്ങൾക്ക് വഴിതെളിക്കുന്നു.