സ്വര്‍ണം വന്‍ കുതിപ്പില്‍; തുടര്‍ച്ചയായ മൂന്നാം ദിനവും വര്‍ധിച്ചു… ട്രംപ് ഇഫക്ട് തീര്‍ന്നു, പവന്‍ വില അറിയാം.

കേരളത്തില്‍ സ്വര്‍ണവില തുടര്‍ച്ചയായി വര്‍ധിക്കുന്നു. കഴിഞ്ഞ മൂന്ന് ദിവസത്തിനിടെ 1500 രൂപയോളം വര്‍ധിച്ചു. നേരത്തെ വലിയ ഇടിവ് രേഖപ്പെടുത്തി ആശ്വാസം പ്രകടിപ്പിച്ചിരുന്ന സ്വര്‍ണം അതിവേഗം തിരിച്ചുകയറുകയാണിപ്പോള്‍. അമേരിക്കന്‍ പ്രസിഡന്റ് തിരഞ്ഞെടുപ്പ് നല്‍കിയ ആശ്വാസം തീര്‍ന്നു എന്നാണ് വിപണിയില്‍ നിന്നുള്ള വിവരം.

ഈ മാസം ഏറ്റവും ഉയര്‍ന്ന പവന്‍ വില 59080 രൂപയായിരുന്നു. ഏറ്റവും കുറവ് 55480 രൂപയും. ഈ നിരക്കില്‍ നിന്നാണ് കഴിഞ്ഞ മൂന്ന് ദിവസമായി ഉയരാന്‍ തുടങ്ങിയത്. 480 രൂപയാണ് തിങ്കളാഴ്ച കൂടിയത്. ചൊവ്വാഴ്ച 560 രൂപ വര്‍ധിച്ചു. ഇന്ന് 400 രൂപയും കൂടി. വരും ദിവസങ്ങളിലും ഇതേ ട്രെന്‍ഡ് തുടരുമെന്നാണ് സൂചന. ഇന്നത്തെ സ്വര്‍ണവിലയും വിപണിയിലെ മാറ്റങ്ങളും അറിയാം.

കേരളത്തില്‍ ഇന്ന് ഒരു പവന്‍ സ്വര്‍ണത്തിന് 56920 രൂപയാണ് വില. ഗ്രാമിന് 50 രൂപ വര്‍ധിച്ച് 7115 രൂപയിലെത്തി. 18 കാരറ്റ് സ്വര്‍ണം ഗ്രാമിന് 40 രൂപ കൂടി 5870 രൂപയിലെത്തി. വെള്ളിയുടെ വില മാറ്റമില്ലാതെ ഗ്രാമിന് 99 രൂപ നിരക്കില്‍ തുടരുകയാണ്. ആഗോള വിപണിയിലും സ്വര്‍ണവില കൂടുന്നതാണ് ട്രെന്‍ഡ്. ഔണ്‍സ് സ്വര്‍ണം 2640 ഡോളര്‍ നിരക്കിലാണിപ്പോള്‍ വ്യാപാരം. 2550ലേക്ക് നേരത്തെ ഇടിഞ്ഞിരുന്നു.

ഡോളര്‍ സൂചിക 106.26 എന്ന നിരക്കിലാണുള്ളത്. ഡോളര്‍ കരുത്ത് വര്‍ധിപ്പിച്ചാല്‍ സ്വര്‍ണവില കുറയും. അതേസമയം, ക്രൂഡ് ഓയില്‍ വില കൂടുന്ന ട്രെന്‍ഡ് കാണിക്കുന്നുണ്ടെങ്കിലും വന്‍ മുന്നേറ്റമില്ല. ബ്രെന്റ് ക്രൂഡ് ബാരലിന് 73.28 ഡോളര്‍ ആണ് പുതിയ വില. രൂപയുടെ മൂല്യം ആശങ്കപ്പെടുത്തുന്നുണ്ട്. ഡോളറിനെതിരെ 84.40 എന്ന നിരക്കിലാണ് രൂപ. ഇത് ആഭ്യന്തര വിപണിയില്‍ തിരിച്ചടിയാണ്.