“വിഷു- ഈസ്റ്റർ ഉത്സവകാലത്ത് വിപണി വില നിയന്ത്രിക്കാൻ നടപടിയുമായി സംസ്ഥാന സർക്കാർ. സബ്സിഡി നിരക്കിൽ സാധനങ്ങൾ ലഭ്യമാക്കാൻ കൺസ്യൂമർഫെഡും സപ്ലൈകോയും ഒരുങ്ങി.
ഏപ്രിൽ 12 മുതൽ 21 വരെ കൺസ്യൂമർ ഫെഡിൻ്റെ വിഷു ഈസ്റ്റർ സബ്സിഡി വിപണി പ്രവർത്തിക്കും.14 ജില്ലാ കേന്ദ്രങ്ങളെ ഉൾപ്പെടുത്തി ആകെ 170 വിപണ കേന്ദ്രങ്ങളാണ് പ്രവർത്തിക്കുക. അരി, പഞ്ചസാര, ഉഴുന്ന്, ചെറുപയർ, കടല, മുളക്, വെളിച്ചെണ്ണ തുടങ്ങി നിത്യോപയോഗ സാധങ്ങൾക്ക് സബ്സിഡി ലഭിക്കും.പൊതു വിപണിയിൽ 1605 രൂപയിലധികം വില വരുന്ന സാധനങ്ങൾ 1136 രൂപയ്ക്കാണ് കൺസ്യുമർ ഫെഡ് വഴി ലഭ്യമാക്കുന്നത്. വിപണികളുടെ സംസ്ഥാനതല ഉദ്ഘാടനം 11 ന് തിരുവനന്തപുരം സ്റ്റാച്യുവിൽ മന്ത്രി വി. എൻ. വാസവൻ നിർവഹിക്കും.
ഏപ്രിൽ 10 മുതൽ 19 വരെ സംസ്ഥാനത്തെ എല്ലാ താലൂക്കിലെയും സപ്ലൈകോ വിഷു– ഈസ്റ്റർ ഫെയർ ആയി പ്രവർത്തിക്കും. സബ്സിഡി സാധനങ്ങൾക്ക് പുറമേ, തെരഞ്ഞെടുത്ത ബ്രാൻഡഡ് അവശ്യ ഉൽപ്പന്നങ്ങൾക്കും, സപ്ലൈകോയുടെ സ്വന്തം ബ്രാൻഡ് ആയ ശബരി ഉൽപ്പന്നങ്ങൾക്കും വിലക്കുറവും ഓഫറുകളും നൽകുന്നുണ്ട്. മിതമായ നിരക്കിൽ ഗുണമേന്മയുള്ള സാധനങ്ങൾ ജനങ്ങളിലേക്ക് എത്തിക്കുക എന്നതാണ് ലക്ഷ്യം.
