3 വർഷത്തെ ബിരുദ കോഴ്സ് രണ്ടര വർഷംകൊണ്ടു പൂർത്തിയാക്കാം, 4 വർഷ കോഴ്സ് ഇനി 3 വർഷം കൊണ്ടും. ഇതിനായുള്ള പദ്ധതി തയാറാക്കുകയാണ് യുജിസി. ബിരുദ കോഴ്സുകൾ നിശ്ചിത കാലയളവിനു മുൻപു പൂർത്തിയാക്കാനുള്ള മാനദണ്ഡങ്ങൾ തയാറാക്കുന്നതിന്റെ വിശദാംശങ്ങൾ കഴിഞ്ഞ ദിവസം യുജിസി ഭരണസമിതി യോഗത്തിൽ അവതരിപ്പിച്ചെന്നാണു വിവരം.
പരമ്പരാഗതമായ 3 വർഷ കോഴ്സും പുതിയ വിദ്യാഭ്യാസ നയം അനുസരിച്ചുള്ള 4 വർഷ കോഴ്സുമാണു നിലവിൽ ബിരുദപഠനത്തിനുള്ളത്. മൾട്ടിപ്പിൾ എൻട്രി – എക്സിറ്റ് സംവിധാനത്തിന്റെ ഭാഗമായി കോഴ്സുകൾ ഇടയ്ക്കു നിർത്താനും മടങ്ങിയെത്തി പൂർത്തിയാക്കാനും അവസരമുണ്ട്. ബിരുദ കോഴ്സ് പൂർത്തിയാക്കാൻ അധികമായി 2 വർഷം സാധസാധാരണ അനുവദിക്കാറുണ്ടെങ്കിലും കാലയളവിനു മുൻപു പൂർത്തിയാക്കാൻ നിലവിൽ അനുവാദമില്ല. ഇതിനാണു മാറ്റംവരിക.ആവശ്യമായ ക്രെഡിറ്റ് കോഴ്സ് സമയത്തിനു മുൻപു പൂർത്തിയാക്കിയാൽ ബിരുദം നൽകുന്ന സംവിധാനം വരുന്ന അധ്യയനവർഷം മുതൽ നടപ്പാക്കുകയാണു ലക്ഷ്യം.
