റസ്റ്ററൻ്റിലായായും കഫേയിലായാലും കട്ലെറ്റിനൊപ്പം ‘സോസെത്തുമ്പോഴാണ്’ രുചി പൂർണ്ണമാകുന്നത്. എന്നാൽ നമ്മൾ കഴിക്കുന്നത് സോസാണോ കെച്ചപ്പാണോ എന്ന സംശയമുണ്ടായിട്ടുണ്ടോ?
തക്കാളി പ്രധാന ചേരുവയായ ടൊമാറ്റോ സോസും ടൊമാറ്റോ കെച്ചപ്പും തമ്മിലുള്ള വ്യത്യാസം രുചിയിൽ മാത്രമാണോ എന്നത് പലരെയും ആശയക്കുഴപ്പത്തിലാക്കാറുണ്ട്. ടൊമാറ്റോ സോസെന്ന് പറയാറുണ്ടെങ്കിലും നമ്മൾ പലഹാരങ്ങൾ മുക്കി കഴിക്കുന്ന തക്കാളികൊണ്ടുള്ള ആ വിഭവം കെച്ചപ്പാണ്.
തക്കാളി പേസ്റ്റ്, വിനാഗിരി, പഞ്ചസാര, കൂട്ടത്തിൽ മറ്റ് സുഗന്ധവ്യഞ്നങ്ങളും ചേർത്താണ് കെച്ചപ്പ് തയ്യാറാക്കുന്നത്. ബർഗർ, സാൻവിച്ച് പോലുള്ളവയുടെ കൂടെ കഴിക്കാനും ഫ്രഞ്ച് ഫ്രൈസ്, കട്ലെറ്റ് പോലുള്ളവ മുക്കി കഴിക്കാനുള്ള ഡിപ്പായുമാണ് കെച്ചപ്പ് ഉപയോഗിക്കുന്നത്. തക്കാളി, സവാള, വെളുത്തുള്ളി അടക്കമുള്ള പച്ചക്കറികൾ ചേർത്താണ് ടൊമാറ്റോ സോസ് ഉണ്ടാക്കുന്നത്. കെച്ചപ്പിന്റേതു പോലെ കട്ടിയുള്ള പരുവമല്ല സോസിന്റേത്. പാസ്ത പോലുള്ള വിഭവങ്ങൾക്ക് മുകളിൽ ടോപ്പിങ്ങ് ആയാണ് സോസ് ഉപയോഗിക്കുന്നത്. ചേരുവകൾ മണിക്കൂറുകളോളം മീഡിയം ലോ ഫ്ളെയിമിൽ പാചകം ചെയ്താണ് സോസ് തയ്യാറാക്കുന്നത്.
അതേ സമയം മിക്സിയിൽ അരച്ച തക്കാളി തിളപ്പിച്ച ശേഷം അരിച്ചുമാറ്റിയാണ് കെച്ചപ്പ് തയ്യാറാക്കുന്നത്. ഇതിലേക്ക് വിനാഗിരിയും പഞ്ചസാരയും ഉപ്പും മറ്റ് ചേരുവകളും ചേർത്താണ് കട്ടിയുള്ള പരുവത്തിലേക്ക് മാറ്റുന്നത്.
പഞ്ചസാരയാണ് പ്രധാന വ്യത്യാസം
തക്കാളി, സവോള, കുരുമുളക്പൊടി, വെളുത്തുള്ളി തുടങ്ങിയവയാണ് ടൊമാറ്റോ സോസിൽ പ്രധാന ചേരുവകൾ. എന്നാൽ തക്കാളിയിലെ നേരിയ മധുരത്തിനു പുറമേ പഞ്ചസാരയും കെച്ചപ്പിൽ ചേർക്കാറുണ്ട്. കെച്ചപ്പിന്റെ കട്ടിക്കു പിന്നിലും പഞ്ചസാരയ്ക്കും പങ്കുണ്ട്.
സോസ് ചൂടോടെ വിളമ്പുമ്പോൾ തണുത്ത ശേഷമാണ് കെച്ചപ്പ് ഡിപ്പായി നൽകാറുള്ളത്.
കൂടുതൽ കാലം സൂക്ഷിക്കുന്നതിനായി കെച്ചപ്പിൽ ചേർക്കുന്ന വിനാഗിരി സോസിൽ ചേർക്കാറില്ലെന്നതും പ്രധാന വ്യത്യാസമാണ്.
