വിദ്യാലയങ്ങൾക്ക് ഇൻഷുറൻസ് പരിരക്ഷ, ഒപ്പം വിദ്യാർഥികൾക്കും

വിദ്യാലയങ്ങളുടെ റിസ്കുകളിൽ ഏറ്റവും പ്രധാനം കെട്ടിടങ്ങളുടെ കാര്യമാണ്. രണ്ടു വർഷത്തിനടുത്തായി പരിചരണം ഇല്ലാതെ കിടക്കുന്ന പല കെട്ടിടങ്ങൾക്കും ബലക്ഷയം സംഭവിക്കാൻ ഇടയുണ്ട്. ഇവ കണ്ടെത്തി അറ്റകുറ്റപ്പണികൾ ചെയ്ത് കുട്ടികൾക്ക് സുരക്ഷിതമാണെന്ന് ഉറപ്പുവരുത്തണം. മാത്രമല്ല, കെട്ടിടങ്ങൾ ഇൻഷുർ ചെയ്ത് സുരക്ഷിതമാക്കാനും അധികൃതർ ശ്രദ്ധിക്കണം. കെട്ടിടത്തിനു പുറമെ ഫർണിച്ചർ, ലൈബ്രറി, ലബോറട്ടറി, ഓഫീസ് മുതലായവയും ഇൻഷുർ ചെയ്ത് സുരക്ഷിതമാക്കാവുന്നതാണ്. വിദ്യാർഥികൾ സഞ്ചരിക്കുന്ന സ്ഥാപനത്തിന്റെ വാഹനങ്ങൾ യഥാവിധി ഇൻഷുർ ചെയ്ത് സംരക്ഷിക്കേണ്ടതും സ്ഥാപനത്തിന്റെ കടമയാണ്.വിദ്യാർഥികൾക്കുള്ള റിസ്കുകൾക്കാണ് ഏറ്റവും പ്രാധാന്യം നൽകേണ്ടത്. വിദ്യാഭ്യാസത്തിനായി എത്തുന്ന കുട്ടികൾക്ക് അസുഖം, അപകടം എന്നിവ വരുമ്പോൾ ഏറ്റവും അടുത്ത ആശുപത്രിയിൽനിന്ന് ചികിത്സ നൽകേണ്ട ചുമതല വിദ്യാഭ്യാസ സ്ഥാപനത്തിന്റേതാണ്. ഭൂരിഭാഗം സ്ഥാപനങ്ങളിലും ഇപ്പോൾ ഇതിനായി പ്രത്യേക ഫണ്ടോ, സംവിധാനമോ ഇല്ലെന്നു പറയാം. എന്നാൽ, വിദ്യാർഥികളെ ഇൻഷുർ ചെയ്യുകയും ഒപ്പംതന്നെ ഏറ്റവുമടുത്തുള്ള നല്ലൊരു ആശുപത്രിയുമായി സഹകരിച്ച് സൗജന്യ ചികിത്സ ഉറപ്പുവരുത്തുകയും ചെയ്യാവുന്നതാണ്.