എ.ടി.എമ്മുകളിൽനിന്ന് കാശെടുക്കുമ്പോൾ മിക്കപ്പോഴും 500 രൂപ നോട്ടുകൾ മാത്രമല്ലേ കിട്ടാറുള്ളു? ചില്ലറയായി കിട്ടണമെന്ന് വിചാരിച്ചാലും മെഷീൻ അടിച്ചെണ്ണി തരുന്നത് 500-ന്റെ നോട്ടുകളായിരിക്കും. എന്നാൽ ഇനി മുതൽ അങ്ങനായിരിക്കില്ല. ജനങ്ങൾ കൂടുതലായി ഉപയോഗിക്കുന്ന 100, 200 രൂപ നോട്ടുകൾ എടിഎമ്മുകൾ വഴി നിർബന്ധമായും ലഭ്യമാക്കണമെന്ന് ബാങ്കുകൾക്ക് നിർദേശം നൽകിയിരിക്കുകയാണ് റിസർവ് ബാങ്ക് ഓഫ് ഇന്ത്യ. ഘട്ടംഘട്ടമായി ബാങ്കുകളും വൈറ്റ്ലേബൽ എടിഎം കമ്പനികളും ഇത് നടപ്പാക്കാനാണ് നിർദേശം.
2025 സെപ്റ്റംബർ 30 ആകുമ്പോഴേക്കും രാജ്യത്തെ 75 ശതമാനം വരെ എടിഎമ്മുകളിൽ സ്ഥിരമായി 100 അല്ലെങ്കിൽ 200 രൂപ നോട്ടുകളുണ്ടാകണം. 2026 മാർച്ച് 31നകം 90 ശതമാനം എടിഎമ്മുകളിലും 100,200 രൂപ നോട്ടുകൾ ലഭ്യമാക്കണമെന്നും ആർബിഐയുടെ ഉത്തരവിൽ പറയുന്നു. അതായത് ഇനിയങ്ങോട്ട് എടിഎമ്മുകളിൽനിന്ന് 500 രൂപ നോട്ടുകൾക്കൊപ്പം 100, 200 രൂപ നോട്ടുകളും സുലഭമായി കൈയിൽകിട്ടും.
