കാലാവസ്ഥാ വ്യതിയാനത്തെ തുടർന്ന് സമുദ്രത്തിന് ചൂടുകൂടുന്നു.

നമ്മൾ കരുതുന്നതിലും വേഗത്തിലാണ് സമുദ്രത്തിന് ചൂട് വർധിക്കുന്നതെന്നും ഇത് കനത്ത ആശങ്കയാണുയർത്തുന്നതെന്നും ബ്രിട്ടീഷ് അന്‍റാർട്ടിക് സർവേ സംഘത്തിലെ പ്രഫസർ മൈക് മെറഡിത്ത് പറയുന്നു. നമ്മൾ ഒരിക്കലും പ്രതീക്ഷിക്കാത്ത തരത്തിലാണ് കാലാവസ്ഥ മാറുന്നത്. ഈ ദിശയിൽ മുന്നോട്ട് പോകുന്നത് വലിയ പ്രത്യാഘാതമുണ്ടാക്കും -അദ്ദേഹം പറയുന്നു.താപനിലയിലുണ്ടാകുന്ന വ്യതിയാനം കടൽ ജീവികളേയും പവിഴപ്പുറ്റുകളേയും സാരമായി ബാധിക്കുകയാണ്. അടുത്തിടെ റിപ്പോർട്ട് ചെയ്ത പവിഴപ്പുറ്റുകളുടെ നാശം സമുദ്രത്തിലെ കാലാവസ്ഥാ വ്യതിയാനത്തിന്‍റെ ഏറ്റവും പ്രകടമായ ഉദാഹരണമാണ്. ചൂടുകാരണം പവിഴപ്പുറ്റുകൾ വെള്ള നിറത്തിലേക്ക് മാറുകയും നശിക്കുകയുമാണ് ചെയ്യുന്നത്. സമുദ്രത്തിലെ ജീവിവർഗങ്ങളിൽ നാലിലൊന്നിന്‍റെയും വാസസ്ഥലങ്ങളായ പവിഴപ്പുറ്റുകളുടെ നാശം ജൈവസമ്പത്തിനെ തകിടം മറിക്കും.ഇന്ത്യൻ മഹാസമുദ്രത്തിൽ ചൂട് വർധിക്കുകയാണെന്ന് പുണെയിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് ട്രോപ്പിക്കൽ മെറ്റീരിയോളജിയിലെ റോക്സി മാത്യു കോളിൻ്റെ നേതൃത്വത്തിൽ നടത്തിയ പഠനത്തിൽ കണ്ടെത്തിയിരുന്നു. സമുദ്രജലത്തിന്‍റെ താപനിലയിലെ ഏറ്റവും ഉയർന്ന വർധനവ് കാരണം ഇന്ത്യയിലും പരിസര പ്രദേശങ്ങളിലും ഗുരുതരമായ പ്രത്യാഘാതങ്ങൾക്ക് സാധ്യതയുണ്ടെന്ന് ഗവേഷകർ പറയുന്നു. സമുദ്രത്തിലെ ചൂട് തരംഗങ്ങൾ ഇന്ത്യൻ മഹാസമുദ്രത്തെ ഒരു സ്ഥിരമായ താപതരംഗാവസ്ഥയിലേക്ക് തള്ളിവിടാൻ സാധ്യതയുണ്ട്. ഈ ഉഷ്ണതരംഗങ്ങൾ ചുഴലിക്കാറ്റുകളുടെ സഞ്ചാരം വേഗത്തിലാക്കുകയും പവിഴപ്പുറ്റുകളുടെയും സമുദ്ര ആവാസവ്യവസ്ഥയുടെയും നാശത്തിനും കാരണമാകുന്നു.