“കുളിക്കാത്ത ഒരു ദിവസം… അത് സങ്കല്പിക്കാൻ പോലുമാവില്ല. മിക്കവരും ദിവസം ഒന്നിൽക്കൂടുതൽ തവണ ഉറപ്പായും കുളിച്ചിരിക്കും. അതാണ് മലയാളികളും കുളിയും തമ്മിലുള്ള ബന്ധം. എന്നാൽ കുളിയുടെ കാര്യത്തിൽ മലയാളികളെയും പിന്നിലാക്കി കുതിക്കുകയാണ് ബ്രസീൽ. ലോകത്ത് ഏറ്റവും കൂടുതൽ കുളിക്കുന്നതും ബ്രസീലുകാർ തന്നെയാണ്. ഇവിടത്തെ ആളുകൾ ഒരാഴ്ച ശരാശരി 14 തവണയെങ്കിലും കുളിക്കും എന്നാണ് അടുത്തിടെ നടന്ന ഒരു ഗവേഷണത്തിൽ വ്യക്തമായത്. കുളിക്കണക്കിലെ ആഗോള ശരാശരി അഞ്ചുമാത്രമാണെന്ന് ഓർക്കണം. കാന്താൽ വേൾഡ് പാനലാണ് ഗവേഷണത്തിന് പിന്നിൽ പ്രർത്തിച്ചത്.
വൃത്തിയുടെ പേരിൽ വിട്ടുവീഴ്ചയില്ലാത്തതുകൊണ്ടാണ് ബ്രസീലുകാർ കുളിയെ ഇത്രയധികം സ്നേഹിക്കുന്നത് എന്ന് വിചാരിക്കരുതേ.
കാലാവസ്ഥയാണ് ഇവരെ കുളിക്കാൻ പ്രേരിപ്പിക്കുന്നത്. പലപ്പോഴും കടുത്ത ചൂടാണ് ഇവിടെ. രാജ്യത്തെ ശരാശരി താപനില 24.6 ഡിഗ്രി സെൽഷ്യസാണ്. വർഷത്തിലെ ഒട്ടെല്ലാ മാസത്തിലും ഇത്രയധികം ചൂടുകാണുകയും ചെയ്യും. ബ്രസീലുകാരിൽ 99 ശതമാനവും കുളിക്കുമ്പോൾ ജർമ്മൻകാരിൽ 92 ശതമാനം പേർ മാത്രമാണ് കുളിക്കുന്നത്. അമേരിക്ക 90, ചൈന 85, ബ്രിട്ടൺ 83 ശതമാനം എന്നിങ്ങനെയാണ് മറ്റുരാജ്യങ്ങളിലെ കുളിക്കണക്ക്. ഒരു ബ്രസീലുകാരൻ ഒരുതവണ കുളിക്കാൻ വേണ്ടി ചെലവാക്കുന്നത് 10.3 മിനിട്ടാണ്. അക്കാര്യത്തിലും മറ്റുരാജ്യങ്ങളെക്കാൾ മുന്നിലാണ് ബ്രസിലുകാർ. അമേരിക്കാർ കുളിക്കാനായി ചെലവാക്കുന്നത് 9.9 മിനിട്ടും ബ്രിട്ടീഷുകാർ 9.6 മിനിട്ടുമാണ്.
