നിങ്ങളുടെ ഫോണിൽ 5G പ്രവർത്തിക്കുന്നില്ലേ? കാരണങ്ങളും പരിഹാരങ്ങളും അറിയാം.

വോഡഫോൺ ഐഡിയ ലിമിറ്റഡ് (വിഐഎൽ) അടുത്തിടെ മുംബൈയിൽ 5G സേവനങ്ങൾ അവതരിപ്പിച്ചു. രാജ്യത്തെ മൂന്നാമത്തെ വലിയ ടെലികോം ഓപ്പറേറ്റർ കൂടുതൽ സർക്കിളുകളിൽ 5G വ്യാപിപ്പിക്കാനുള്ള ശ്രമത്തിലാണ് ഇപ്പോൾ. എന്നാൽ, നിങ്ങളുടെ Vi 5G സേവനം ഉപയോഗിക്കാൻ ശ്രമിക്കുമ്പോൾ പ്രശ്നങ്ങൾ നേരിടുന്നുണ്ടോ? അതിന് പിന്നിലെ കാരണങ്ങളും പരിഹാര മാർഗങ്ങളും Vi പങ്കുവെച്ചിട്ടുണ്ട്. ചിലപ്പോൾ എല്ലാ 5G നിയമങ്ങളും പാലിച്ചിട്ടും ഫോണിൽ 5G പ്രവർത്തിക്കാതെ വരാം. അത്തരം സാഹചര്യങ്ങളിൽ ശ്രദ്ധിക്കേണ്ട കാര്യങ്ങൾ ഏതെല്ലാമാണെന്ന് മനസ്സിലാക്കാം.

5G പ്രവർത്തിക്കാത്തതിന്റെ സാധ്യതയുള്ള കാരണങ്ങൾ 

പവർ സേവിംഗ് മോഡ്: ഫോൺ പവർ സേവിംഗ് മോഡിലാണെങ്കിൽ, 5G കണക്റ്റിവിറ്റിയിൽ തടസ്സങ്ങൾ ഉണ്ടാകാം.

സിം സ്ലോട്ട് പ്രശ്നം: സിം കാർഡ് സിം 2 സ്ലോട്ടിലാണെങ്കിൽ 5G ശരിയായി പ്രവർത്തിക്കില്ല. സിം 1 സ്ലോട്ടിലേക്ക് മാറ്റി ശ്രമിക്കുക.

ഫോൺ ചൂടാകൽ: ഫോൺ അമിതമായി ചൂടായാൽ 5G ഓഫാകുകയോ പ്രവർത്തനം നിലയ്ക്കുകയോ ചെയ്യാം.

ഫോണിൽ 5G ലഭിക്കുന്നില്ലെങ്കിൽ, ഈ ലളിതമായ പരിഹാരങ്ങൾ പരീക്ഷിക്കാം. 

Airplane mode: മോഡ് ഓണാക്കി കുറച്ച് നിമിഷങ്ങൾ കാത്തിരുന്ന ശേഷം ഓഫാക്കുക. ഇത് നെറ്റ്‌വർക്ക് കണക്ഷൻ പുതുക്കാൻ സഹായിക്കും.

ഫോൺ റീസ്റ്റാർട്ട്: ഫോൺ ഓഫ് ചെയ്ത് വീണ്ടും ഓണാക്കുക. പലപ്പോഴും പ്രശ്നങ്ങൾ പരിഹരിക്കാറുണ്ട്.

കവറേജ് പരിശോധിക്കുക:  പ്രദേശത്ത് 5G ലഭ്യമാണോ എന്ന് ഉറപ്പാക്കുക. Vi-യുടെ വെബ്‌സൈറ്റിലോ Speedtest.net-ലെ Ookla 5G മാപ്പിലോ കവറേജ് പരിശോധിക്കാം.